Qirg‘iziston Madaniyat vazirligi olti oy davomida respublikaning yettita telekanalida rejalashtirilgan tekshiruv o‘tkazdi. Bu haqda vazirlik matbuot ximzati xabar berdi.
Tekshiruv davomida ikkita — “312 KINO” va “312 TV” telekanallari Qirg‘iziston Respublikasining “Televideniye va radioeshittirish to‘g‘risida”gi qonuniga rioya qilmagani aniqlandi. Qonunga ko‘ra, teleko‘rsatuvlarning kamida 60 foizi, jumladan, soat 07:00 dan 10:00 gacha va 18:00 dan 23:00 gacha efirga uzatiladigan dasturlar davlat tilida bo‘lishi shart.
Qayd etilishicha, mazkur telekanallarning har biri 23 ming som (2,87 million so‘m) miqdorida jarimaga tortilgan.
Qirg‘iz tili to‘g‘risidagi qonun
Qirg‘iziston prezidenti Sadir Japarov 17-iyul kuni “Qirg‘iziston Respublikasining davlat tili to‘g‘risida”gi konstitutsiyaviy qonunni imzolagan edi. Unda davlat xizmatchilari va yana qator soha vakillari uchun qirg‘iz tilini bilish majburiy etib qo‘yilgan. Shuningdek, teleradiokompaniyalar, shu jumladan, xususiy kompaniyalar o‘z ko‘rsatuvlarining kamida 60 foizini qirg‘iz tilida ko‘rsatishi shart, deb belgilangan.
Ma’lumot o‘rnida, Qirg‘izistonda rus tili rasmiy til sifatida qo‘llanadi. Rossiya tashqi ishlar vaziri Sergey Lavrov yangi qonunni “demokratiyaga zid” deb atadi.
Sadir Japarov esa “Davlat tili to‘g‘risida”gi qonunda rus tiliga nisbatan diskriminatsiya yo‘qligini tushuntirdi.
Izoh (0)