АҚШ Сенатининг ташқи алоқалар қўмитаси раҳбари Роберт Менендез Қирғизистон президенти Садир Жапаровга мактуб йўллаб, Россияга қарши санкцияларга амал қилишга чақирди. Мактубнинг тўлиқ матни АҚШ Сенати сайтида эълон қилинди.
Мурожаат Қирғизистон халқаро санкцияларни четлаб ўтиб, Россияга ёрдам бергани ҳақидаги иддаолар билан боғлиқ. Менендез бундай айбловлар демократик тамойиллардан четланиш фонида юзага келганини таъкидлаб, Садир Жапаровни йўналишни ўзгартиришга чақирди.
“Уруш бошланганидан бери Қирғизистон Россия билан импорт-экспорт бизнесини кескин кенгайтирди. Ҳукуматингизнинг ҳаракатсизлиги ёки ундан ҳам ёмони, Россия билан дронлар, самолёт қисмлари, қурол компонентлари ва электр занжирлари каби санкцияланган маҳсулотлар савдосини осонлаштиришда иштирок этиши Россияга халқаро санкцияларни четлаб ўтиш имконини беради”, — дейилади мактубда.
Сенатор Қирғизистон ҳукуматини санкциялардан бўйин товлаш бўйича ушбу жиддий айбловларни зудлик билан текширишни ва мамлакат орқали ноқонуний товарлар оқимининг олдини олиш учун кучлироқ тизим йўлга қўйишга чақирди.
“Бундан ташқари, Қирғизистоннинг Россияга қарши халқаро санкцияларни қўллаб-қувватламагани давом этаётган демократик орқага силжиш ва инсон ҳуқуқларининг кенг миқёсда бузилишининг аломати, холос, деб қўрқаман.
Ҳукуматингиз ҳокимият институтларини заифлаштирди, журналистлар ва мустақил оммавий ахборот воситаларининг ҳуқуқларини қайта-қайта поймол қилди, ҳуқуқ ҳимоячиларини таъқиб қилди, фуқаролик жамияти вакилларига чекловлар қўйди. Бир пайтлар Марказий Осиёда демократиянинг ёрқин нури бўлган Қирғизистон автократия сари хавфли йўлдан бормоқда”, — дейди сенатор.
У Қирғизистон президентини мустақил оммавий ахборот воситалари ва журналистлар фаолиятига қўйилган барча чекловларни олиб ташлашга, қамоққа олинган ҳуқуқ ҳимоячиларини озод қилишга ва уюшмалар эркинлиги каби асосий эркинликларни чекловчи чораларни бекор қилишга чақирди.
Изоҳ (0)