Дунё давлатлари ядро қуролидан бутунлай воз кечиши керак, деди Бирлашган Миллатлар Ташкилоти бош котиби Антониу Гутерриш Японияда Хиросимага бомба ташланганига 78 йил тўлиши муносабати билан ўтказилган хотира тадбирига йўллаган мурожаатида.
“Совуқ уруш даврида дунёга хавф солган ядро сояси яна пайдо бўлди”, — деб хатни ўқиб берди Гутерришнинг қуролсизланиш бўйича ўринбосари Изуми Накамицу.
Гутерриш ўз мурожаатида баъзи давлатлар “ядро қиличини бепарволик билан ўйнатишда” давом этаётганини таъкидлади. БМТ раҳбари барча давлатларни ядровий қуролсизланишни якунига етказишга чақирди ва буни ташкилотнинг асосий мақсади деб атади.
Шу билан бирга, Гутерриш 78 йил аввал атом бомбасини ким портлатгани ва ҳозирда қайси давлатлар ядровий қуролга эга экани ҳақида сўз очмаган.
Иккинчи жаҳон уруши якунида Япониянинг Хиросима ва Нагасаки шаҳарларида АҚШ Қуролли кучлари томонидан атом бомбалари синовдан ўтказилган. Бомба 6 августда Хиросимага, 9 августда Нагасакига ташланган. Ушбу портлашлар инсоният тарихида ядро қуролидан фойдаланиш бўйича ягона ҳодиса бўлди, унинг оқибатида эса 200 мингга яқин одам ҳалок бўлди.
Изоҳ (0)