Япония август ойи охирида Фукусима-1 атом электр станциясидаги (АЭС) сувни Тинч океанига тўкишни бошлайди, деб ёзмоқда The Guardian.
Япония бош вазири Фумио Кисида АҚШга сафаридан кейин вазирлар йиғилишида АЭСдаги сувни чиқариб ташлаш бўйича қарор қабул қилиши кутилмоқда, деб ёзади газета.
Кисида 18 август куни Вашингтонда бўлиб ўтадиган Япония—АҚШ—Жанубий Корея саммитида АҚШ президенти Жо Байден ва Жанубий Корея етакчиси Юн Сок Ёл билан музокаралар ўтказишни режалаштирган. Шундан кейин расмий қарор қабул қилингач, сувни оқизишга тайёрлаш учун тахминан бир ҳафта вақт кетади. Бундан келиб чиқилса, жараён август охирида бошланади, дейди нашр манбалари.
Хитой Фукусима АЭСдаги сувни океанга тўкишга қарши
2011 йилдаги зилзила ва сунами оқибатида юзага келган авариядан сўнг Фукусима АЭС ҳудудида шикастланган реакторларни совутишда фойдаланиладиган 1 000 дан ортиқ сув резервуарлари тўпланиб қолган, бу тахминан 1,3 миллион куб метр сувни ташкил этади. Япония расмийларига кўра, 2024 йил бошида барча резервуарлар тўлиб бўлади.
Уларда сақланадиган сув яхшилаб тозаланган, аммо унда ҳали ҳам водороднинг радиоактив изотопи — тритий бор, бу модда изсиз йўқолиб кетмайди. Япония ҳукумати бу сувни денгизга тўкиш зарурлигини айтиб, бу дунёнинг бошқа атом электр станцияларида ҳам одатий ҳол эканини таъкидламоқда.
Хитой АЭСдаги сувни океанга тўкишга қатъиян қарши. Хитой элчиси бу дастурни нотўғри деб атади ҳамда Япония дастурни тўхтатиб, биринчи навбатда қўшни давлатлар билан маслаҳатлашувлар ўтказиши кераклигини айтди. 4 июль куни Атом энергияси бўйича халқаро агентлик (МАGATE) раҳбари Рафаэль Гросси Японияга ташриф буюрди ва сувни океанга тўкиш қарорини маъқуллади. Унинг таъкидлашича, оқинди сув сифатига, балиқларга ва яқин атрофдаги манзилгоҳларга катта таъсир қилмайди.
Изоҳ (0)