“Мутлақо қонуний”. УХХ раҳбари Россия кемаларига қилинган дрон ҳужумига изоҳ берди

Украина хавфсизлик хизмати раҳбари Василий Малюк денгиз дронларининг Россия кемаларига қилган ҳужумига изоҳ берар экан, бундай операциялар “мутлақо қонуний” эканини айтди. Унинг баёноти УХХ Telegram каналида эълон қилинди.

Малюкнинг сўзларига кўра, Россия кемаларида ёки Қрим кўпригида содир бўладиган ҳар қандай “қасир-қусур” душманга нисбатан мутлақо мантиқий ва самарали қадамдир.

Бундай махсус операциялар Украина ҳудудий сувларида ўтказиляпти ва улар мутлақо қонуний. Шундай экан, агар руслар “қасир-қусур” тўхтатилишини истаса, ягона имкониятдан фойдаланиши керак — Украинанинг ҳудудий сувлари ва еримиздан кетиши керак. Буни қанча тез қилса, уларга шунча яхши бўлади. Чунки биз бу урушда душманни тўлиқ енгамиз, — деди Малюк.

4 август куни эрталаб Россия Мудофаа вазирлиги Новороссийск ҳарбий-денгиз базасига иккита ҳарбий дрон ҳужум қилгани, ҳужум қайтарилганини маълум қилди. Уруш тарафдори блоггерлар Новороссийскда “Оленегорский горняк” десант кемаси шикастлангани ҳақида хабар берди. Украина оммавий ахборот воситалари буни УХХнинг махсус операцияси деб атади.

Бугун, 5 август куни эрталаб Керч бўғози ҳудудида бўлган Россиянинг Сиг танкерига денгиз дрони келиб урилди. Танкернинг двигатель жойлашган қисми шикастланган. Украина ОАВ манбаларга таяниб, бу ҳам УХХ махсус операция бўлганини хабар қилди.