Ҳаво ҳужумидан мудофаа ва радиоэлектрон кураш тизимлари Қрим шарқида дронларнинг ҳужумини қайтарди, деди аннексия қилинган яриморол раҳбари Сергей Аксенов. Унга кўра, ҳаво ҳужумидан мудофаа тизими томонидан тўққизта учувчисиз учар аппарат уриб туширилган, 19 таси электрон уруш ёрдамида бостирилган. Кейинроқ Россия Мудофаа вазирлиги аниқлик киритишича, 17 та дрон уриб туширилган, 11 таси бостирилган.
Аксенов Telegram’да ҳеч ким жабрланмаганини ёзди. Мудофаа вазирлиги ҳеч қандай вайронагарчилик йўқлигини маълум қилди.
Қрим раҳбари айнан қайси объектларга ҳужум нишони бўлганига аниқлик киритмади.
Яриморолнинг шарқида Қрим кўприги жойлашган, унда 17 июль куни эрталаб портлаш содир бўлганди. Оқибатда икки киши ҳалок бўлган ва 14 ёшли қиз жароҳатланган. Кўприкда ҳаракатланиш бир неча соатга тўхтатилган.
Россия расмийлари кўприкнинг бузилишини “Киев режимининг террористик ҳаракати” деб атади. Россия президенти Владимир Путин ҳужумга “жавоб” ваъда қилди.
Украина портлашга алоқадорлигини расман тасдиқламади. Украина разведкаси ва хавфсизлик хизматидаги манбалар портлаш УХХ ва Украина Ҳарбий-денгиз кучларининг қўшма операцияси бўлганини, кўприкни портлатиш учун сув усти дронлари қўлланганини таъкидлади.
Изоҳ (0)