АҚШ давлат котиби Энтони Блинкен мамлакат Нигер ҳукуматига фойда келтирадиган айрим хорижий ёрдам дастурларини молиялаштиришни тўхтатганини маълум қилди. Унинг баёноти Давлат департаменти сайтида чоп этилди.
Таъкидланишича, бу вақтинчалик чора бўлиб, Вашингтоннинг Нигердаги ҳамма ёрдам дастурларига ҳам таъсир қилмайди. Қўшма Штатлар инсонпарварлик ва озиқ-овқат ёрдамини кўрсатишда давом этади. Бундан ташқари, АҚШ ҳукумати вакилларининг мамлакатдаги фаолияти, жумладан дипломатик операциялар ва Америка фуқароларининг хавфсизлигини таъминлаш бўйича ҳаракатлар “имкон қадар” давом этяпти.
“АҚШнинг Нигер ҳукуматига ёрдам кўрсатиши демократик бошқарув ва конституциявий тузумга ҳурмат билан боғлиқ. Бу ECOWAS (Ғарбий Африка давлатлари иқтисодий жамияти) ва Африка Иттифоқи томонидан қабул қилинган қадамларга мос келади. АҚШ ҳукумати ташқи ёрдамимиз ва ҳамкорлигимизни қайта кўриб чиқишда давом этади”, — деди Блинкен.
Шу билан бирга, у Вашингтон Нигерга ёрдам беришга содиқлигини таъкидлади ва мамлакатда демократик йўл билан сайланган ҳукуматни тиклашга чақирди.
Нигерда ҳарбийлар давлат тўнтариши уюштирди
Нигерда давлат тўнтариши 26 июль куни содир бўлди. Қўзғолончилар – президент қўриқчиси, армия қўмондонлари билан биргаликда Нигер президенти Муҳаммад Базумнинг лавозимидан четлатилгани ва ҳибсга олинганини эълон қилди. Улар чегараларни ёпди ва мамлакатда комендантлик соати жорий этди.
Президент гвардияси бошлиғи Абдураҳмон Чиани ўзини янги раҳбар деб эълон қилди. Европа Иттифоқи, Бирлашган Миллатлар Ташкилоти, АҚШ ва Африка Иттифоқи исёнчиларнинг ҳаракатларини қоралади.
АҚШ Давлат департаменти давлат тўнтариши туфайли дипломатик ваколатхоналар ходимларининг бир қисмига мамлакатни тарк этишни буюрди. Жаҳон банки Нигер билан барча операцияларни тўхтатди.
Ғарбий Африка етакчилари, агар ҳарбийлар Базумни ҳокимиятга қайтармаса, қўшин киритиш билан таҳдид қилган. Қўшни Буркина-Фасо ва Мали бунга жавобан Нигер ички ишларига аралашувни уруш эълон қилиш, деб ҳисоблаши ҳақида огоҳлантирган.
Изоҳ (1)
assalom