Россия Мудофаа вазирлиги Москвага 30 май куни эрталаб уюштирилган дронлар ҳужумида Украинани айблади.

“Эрталаб Киев режими Москвадаги объектларга учувчисиз учар аппаратлар ёрдамида теракт уюштирди”, — дейилади вазирлик хабарида.

Мудофаа вазирлиги маълумотларига кўра, шаҳарга саккизта самолёт типидаги дрон ҳужум қилган. Вазирликнинг таъкидлашича, Москва вилоятида “Pantsir-S” зенит-ракета тизими томонидан бешта дрон уриб туширилган, яна учтасига радиоэлектрон курашиш воситалари билан таъсир ўтказилган, натижада улар “назоратни йўқотиб, мўлжалланган нишонлардан оғишган”.

Shot Telegram-канали ўз манбасига таяниб, Москвага 32 та дрон ҳужум қилганини ёзди: улардан 19 таси Москва вилоятида уриб туширилган, ўнга яқини шаҳарда қулаб, дарахтларга илиниб қолган, яна учтаси турар жой биноларига тегган. База Telegram канали Москвага 25 га яқин дрон ҳужум қилганини ёзди.

Украина президент офиси раҳбарининг маслаҳатчиси Михаил Подоляк Breakfast shоw дастури эфирида Москвага қилинган дронлар ҳужумига муносабат билдирди.

“Бир нарсани тушуниш керак. Биласиз, сунъий интеллект даврига ўтмоқдамиз. Балки дронларнинг ҳаммаси ҳам Украинага ҳужум қилишга тайёр эмасдир, балки улар ўз эгаларига қайтиб, улардан баъзи саволларга жавоб хоҳлаётгандир: ‘Нега бизни Украинадаги болаларни уриш учун юборяпсиз? Киевдаги болаларни?’ ва ҳоказо”.

Журналистнинг Украина ҳужумга алоқадорми, деган тўғридан тўғри саволига Подоляк “биз мамнуният билан кузатяпмиз ва ҳужумлар сони ошишини тахмин қиляпмиз”, деб жавоб берди. Аммо, “албатта, бунга бизнинг бевосита алоқамиз йўқ” деб таъкидлади.