Россия ва Украина оммавий ахборот воситалари Қрим кўприги яқинида, Керч бўғози ҳудудида портлашлар содир бўлгани ҳақида хабар берди.
Керч бўғозига дрон ҳужуми оқибатида Россия танкери зарар кўрди, деб ёзмоқда ОАВ. Хабарларга кўра, гап Россиянинг Сиг нефть танкери ҳақида кетмоқда. Сиг Қримдан АҚШ санкциялари остида бўлган Сурияга авиа ёнилғи етказиб берар эди.
Танкердаги портлаш яриморолдан кўриниб турган, деб хабар бермоқда Brief канали.
Ўз навбатида, “Кримский канал” Россия денгиз флотига яқин манбага таяниб, ёзишича, Керч бўғозидан 30 миля ёки 48 километр узоқликда танкерга денгиз дрони қулаган.
“Сиг танкерининг урилгани ҳақидаги маълумотлар тасдиқланмоқда. Экипаж тирик, бироқ двигатель хонаси сув остида қолган. Шунингдек, камида битта дрон Қрим кўпригининг ҳаво ҳужумидан мудофаа тизимлари томонидан уриб туширилган. Ҳозир вазият барқарор, аммо Қора денгизда душман фаоллиги кузатилмоқда, шунинг учун ҳужумлар яна давом этиши мумкин”, — деб хабар берди уруш тарафдори бўлган Россиянинг “Рибар” Telegram канали.
Аввалроқ маҳаллий аҳоли Қрим кўприги ҳудудида портлаш овози эшитилгани ва ёнғин чиққани ҳақида хабар берганди. Запорожье вилояти вакили Владимир Рогов “Қрим кўпригига учувчисиз учоқларнинг йирик ҳужуми” ҳақида гапирган. Унинг таъкидлашича, Россия ҳаво мудофааси учта ерусти дронини уриб туширган, аммо ҳужум давом этмоқда.
Изоҳ (0)