Андижон вилояти Булоқбоши туманидаги тижорат банкларининг бирида фаолият юритувчи ходимларнинг икки нафари пенсионерларга берилиши керак бўлган пулларни талон-торож қилиб, замонавий қимор ўйинларига сарфлаб юборгани аниқланди. Бу ҳақда «Ёшлар» телеканалининг «Янги давр» информацион дастурида хабар берилди.
Аниқланишича, пенсия ва нафақа тўловлари билан ишлаш шўъбаси, пенсия ва нафақа тарқатиш бўйича кассири ва филиалнинг шу ўйналиш бўйича бухгалтерлар назоратчиси филиал бошлиғи томонидан филиалга қарашли банкоматларга масъуллик хизмати бириктирилганлигидан фойдаланиб банкоматларга нақд пулларни жойлаштириш вақтида махсус муҳрларни бузиб, пулларни талон-торож қилган.
Дастлаб филиал биносида жойлашган банкоматдан 4 миллион 200 минг сўм пулларни олган ходимлар ишини давом эттириб, олинаётган пулларнинг миқдорини оширишган. Туманнинг «Нефтчилар» маҳалласида жойлашган банкоматдан 41 миллион 800 минг сўм, «Ширмонбулоқ» маҳалласида жойлашган банкоматдан 65 миллион сўм, жами 111 миллион сўм нақд пулларни қўлга киритган.
Бош прокуратура ҳузуридаги департамент инспекторининг маълум қилишича, талон-торож қилинган ушбу пуллар терговга қадар текширув ҳаракатлари давомида тўлиқ қопланган. Мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
Изоҳ (0)