Оёқларнинг тез-тез совуқ қотиши нафақат жисмонан ноқулайлик, балки юрак-қон томир тизимидаги муаммоларни кўрсатадиган муҳим белги ҳисобланади. Бу ҳақда кардиолог Ануш Аветисян маълум қилди.
Мутахассиснинг сўзларига кўра, оёқ-қўлларнинг доимий музлаши асосан қон айланиш тизимининг бузилиши билан боғлиқ. Бундай ҳолатда қон тўқималарга етарлича етиб бормайди, натижада ҳаво ҳарорати илиқ бўлса ҳам, оёқлар музлайди.
“Юрак билан боғлиқ касалликларга чалинган шахсларда оёқларнинг совиши одатда қон томирлар фаолиятининг бузилиши ва қон оқимининг сустлашуви билан кечади. Масалан, атеросклерозда (қон томирлари деворларида холестерин қуйқалари тўпланадиган хасталик) қон майда артерияларга етарлича етиб бормайди, бу эса оёқлар музлаши, увишиши ва ҳатто енгил жисмоний фаоллик (масалан, юриш) пайтида ҳам оғришига олиб келади”, дейди кардиолог.
Оёқларнинг мунтазам совуқ қотиши сурункали юрак етишмовчилигининг белгиси бўлиши ҳам мумкин. Бундай ҳолатда юрак қон айланишини етарли даражада таъминлай олмайди, натижада оёқларда шиш пайдо бўлади.
Қўл ва оёқларнинг музлашига Рено касаллиги ҳам сабаб бўлиши мумкин. Бу хасталик асаб тизими фаолиятини бузади, совуқ ёки стресс таъсирида майда қон томирлар спазмга учрайди. Бундай ҳолатларда тери оқариб ёки кўкариб кетади ва музлай бошлайди.
Яна бир сабаб эндартериит (эндартеритис облитеранс) бўлиши мумкин. Бу қон томирларининг, айниқса, оёқлардаги майда ва ўрта артерияларнинг сурункали яллиғланиши билан кечадиган касаллик бўлиб, натижада қон томирлари аста-секин тораяди ва ҳатто тўлиқ ёпилиб қолади. Бу эса тўқималарнинг қон билан таъминланишини бузади ва оёқларда совуқлик, оғриқ, увишиш каби симптомларга олиб келади.
Варикоз ҳам оёқларнинг совуқ қотиши билан намоён бўлиши мумкин. Бу ҳолат вена клапанларининг яхши ишламаслиги натижасида қоннинг тўпланиб қолиши ва теридаги бошқа ўзгаришлар билан кечади.
Сурункали веноз етишмовчилиги (СВЙ) эса янада оғир ҳолат бўлиб, у оёқлардаги веноз қон айланишининг узоқ муддатли бузилиши ҳисобланади. Бунда шиш, оғриқ, тери ўзгаришлари ва ҳатто яралар пайдо бўлади. Бу ҳолат оёқлардаги вена клапанлари етарлича ишламаганда юзага келади.
Шунингдек, оёқлар музлаши қандли диабет билан оғриган беморларда ҳам учрайди. Бунда диабетик нейропатия сабабли майда томирлар зарарланади ва уларнинг сезувчанлиги пасаяди. Оёқларнинг совиши увишиш ёки тери рангининг ўзгариши билан бирга кечса, бу жиддий огоҳлантириш белгиси ҳисобланади. Бундай пайтда дарҳол шифокорга мурожаат қилиш зарур. Саломатликни эътиборсиз қолдириш инфаркт ёки инсульт каби оғир оқибатларга олиб келиши мумкин.
Изоҳ (0)