Давлат солиқ қўмитаси Иқтисодиёт ва молия вазирлиги таркибидан чиқарилиб, Вазирлар Маҳкамаси тузилмасига ўтказилди.
Президентнинг тегишли фармони билан Жамшид Қўчқоров бош вазир ўринбосари — Ўзбекистон иқтисодиёт ва молия вазири лавозимига тасдиқланди. Унинг номзоди Олий Мажлис Қонунчилик палатаси депутатлари томонидан маъқулланган.
Президентнинг тегишли қарори билан Вазирлар Маҳкамаси ҳузуридаги Солиқ қўмитаси раиси лавозимига Шерзод Кудбиев тайинланди. Шу муносабат билан у Ўзбекистон иқтисодиёт ва молия вазири лавозимидан озод этилди.
Шерзод Кудбиев Давлат солиқ қўмитасини 2020 йил май ойидан 2022 йил охиригача бошқарган. У бунга қадар президентнинг давлат хизмати ва вакиллик органлари билан ўзаро ҳамкорлик масалалари бўйича маслаҳатчиси, бандлик ва меҳнат муносабатлари вазири, Тошкент шаҳрининг Мирзо Улуғбек тумани ҳокими ва бошқа лавозимларда ишлаб келган.
Эслатиб ўтамиз, президентнинг “Янги Ўзбекистон маъмурий ислоҳотларини амалга ошириш чора-тадбирлари тўғрисида”ги фармони билан 2023 йил 1 январдан Вазирлар Маҳкамаси таркибидаги вазирликлар 25 тадан 21 тага қисқартирилганди. Фармонга мувофиқ Солиқ қўмитаси Иқтисодиёт ва молия вазирлиги таркибига киритилиб, вазирликка Шерзод Кудбиев раҳбар этиб тайинланганди. Жамшид Қўчқоров бош вазир ўринбосарлигига тасдиқланганди.
Изоҳ (0)