Лондонда 10 млн долларлик Samsung телефонлари ўғирлаб кетилди

Лондондаги Xitrou аэропорти яқинида Samsung мобил қурилмаларини ташиётган юк машинаси ўғирлаб кетилди. Бу ҳақда Yonhap хабар берди.

Умумий зарар 10,6 миллион долларга баҳоланмоқда. Жами 12 мингта қурилма йўқолган, шундан 5 мингтадан ортиғи — энг сўнгги Galaxy Z Flip 7 ва Fold 7 “букланадиган” телефонлари бўлган. Товарлар орасида Galaxy С25, Galaxy А16 ва 5000 та Galaxy Watch 8 ақлли соат моделлари ҳам бор. Бу ҳодиса Буюк Британияда қайд этилган энг йирик электрон қурилмалар ўғирликларидан бири сифатида қайд этилган.

Таъкидланишича, ўғирлик пухта режалаштирилган, чунки юк машинаси товар партияси аэропортга етиб келиши биланоқ ўғирлаб кетилган. Британия полицияси тергов бошлаган ва аллақачон ўғриланган контейнерни топди. Бироқ товарлар топилгани ёки йўқлиги ҳақида маълумот берилмаган.

Samsung ушбу телефонларни суғурталагани учун компания катта зарар кўрмайди. Аммо харидорлар эҳтиёт бўлиши лозим, чунки ўғирланган қурилмалар кўпинча иккиламчи бозорларда сотилади. Улар қора рўйхатга киритилиши ёки расмий хизмат кўрсатиш ҳуқуқига эга бўлмаслиги мумкин. Британия полициясининг баҳолашича, ўғирланган мобил қурилмаларнинг 75 фоизигача чет элга олиб чиқиб кетилади, бу эса уларни қидириб топишни анча қийинлаштиради.