Ўзбекистонда 2025 йил июль ойида қуёш ва шамол электр станциялари томонидан 1 млрд 246 млн кВт/соат электр энергияси ишлаб чиқарилди. Энергетика вазирлигининг маълум қилишича, бу — янги рекорд кўрсаткич.
Бугунги кунда Ўзбекистонда умумий қуввати 4119 мегаватт бўлган 11 та қуёш фотоэлектр станцияси ва 4 та шамол электр станцияси “яшил” энергия ишлаб чиқармоқда.
“Таъкидлаш керакки, июль ойида мазкур станциялар томонидан 1 млрд 246 млн кВт/соат электр энергияси ишлаб чиқарилгани мамлакатимиз энергетика тизими учун янги рекорд натижадир”, дейилади вазирлик хабарида.
Қайд этилишича, 1 млрд 246 млн кВт/соат электр энергияси ой давомидаги жами генерациянинг 17 фоизи, деганидир. Июль ойидаги мазкур генерациянинг 760,9 млн кВт/соатлик қисми қуёш электр станциялари томонидан, 485,4 млн кВт/соатлик қисми эса шамол электр станциялари томонидан ишлаб чиқарилди.
Бунинг натижасида:
- 377,5 млн куб метр табиий газ тежалишига эришилди;
- атмосферага 1 млн 120 минг тонна зарарли газларнинг чиқиши олди олинди.
Бундан аввал жорий йил май ойида қуёш ва шамол электр станциялари орқали ишлаб чиқарилган электр энергияси ҳажми 1 млрд 104 млн кВт/соатни ташкил қилиб, ой давомидаги илк рекорд натижа қайд этилган эди. Июль ойида ишлаб чиқарилган электр энергияси эса май ойидагидан 142 млн кВт/соат кўп бўлди.
Изоҳ (0)