Бразилиянинг “Сантос” клуби ҳужумчиси Неймар футбол тарихидаги энг яхши ярим ҳимоячи кимлиги ҳақидаги саволга жавоб берди. Бу ҳақда Championat нашри хабар берди.
Унинг фикрича, бу номга “Барселона” афсонаси, испаниялик футболчи Андрес Инеста муносиб:
Андрес Инеста – мен кўрган энг кучли ярим ҳимоячи. Унинг ўйини ақл бовар қилмайдиган даражада. Инестани жуда самимий ва чинакам афсона сифатида ҳурмат қиламан. Андрес “Олтин тўп” олмаса ҳам, унинг қандай даражадаги ўйинчи экани барчага аён. У ҳеч кимга ўхшамайди, чунки бошқалардан бутунлай фарқ қилади. Инестада нафислик ва майдондаги табиий интеллект мужассам, — дея Неймарнинг сўзларини келтиради Give Me Sport.
Эслатиб ўтамиз, Андрес Инеста 2024 йилнинг октябрь ойида профессионал футболчилик фаолиятини расман якунлаганини эълон қилган эди. Унинг сўнгги клуби — Бирлашган Араб Амирликларининг “Эмирейтс” жамоаси бўлган.
Инеста “Барселона” мактаби тарбияланувчиси ҳисобланади. У клуб тизимида 22 йил давомида фаолият юритиб, каталонияликлар сафида кўплаб совринларни қўлга киритган. Жумладан, у “Барселона” билан 9 марта Ла Лига, 4 марта Чемпионлар Лигаси ва бошқа кўплаб турнирлар ғолибига айланган.
Изоҳ (0)