Жанубий Корея экспорт-импорт банки билан ҳамкорликда “Ҳудудий тиббиёт муассасаларини тиббий асбоб-ускуналар билан жиҳозлаш” лойиҳасини амалга ошириш чора-тадбирлари тўғрисидаги президент қарори қабул қилинди.
Лойиҳасини амалга ошириш учун Корея экспорт-импорт банкининг Иқтисодий ривожланиш ва ҳамкорлик жамғармасидан Ўзбекистонга 10 йил имтиёзли давр билан 40 йил муддатга жами 74 миллион доллар эквивалентидаги Корея вонида имтиёзли қарз ажратилиши маъқулланган.
Лойиҳанинг умумий қиймати 88,78 миллион долларни ташкил қилади. Бундан:
- 74 миллион доллар қарз маблағлари;
- 14,78 миллион доллар солиқ ва божхона тўловлари бўйича имтиёзлар бериш шаклида.
Қарз маблағларини қайтариш, шу жумладан, қўшимча ҳақ ва фоизлар, бошқа тўловлар билан боғлиқ харажатлар Ўзбекистон бюджети маблағлари ҳисобидан қопланади. Бунда, солиқ ва божхона имтиёзлари қўлланиши ёки бюджет маблағлари ҳисобидан тўлаб берилиши натижасида иқтисод қилинган маблағлар Ўзбекистоннинг лойиҳани амалга оширишга қўшган улуши сифатида ҳисобга олинади.
Соғлиқни сақлаш вазирлиги ҳузуридаги “Ўзмедимпекс” давлат муассасаси Лойиҳани амалга ошириш доирасида тендер комиссиясининг ишчи органи ва тузилган шартномалар бўйича контрагент ҳисобланади.
Куни кеча Корея Эксимбанки Иқтисодий ривожланиш ва ҳамкорлик жамғармаси ҳисобидан Республика шошилинч тиббий ёрдам илмий маркази ва унинг ҳудудий филиалларини зарур тиббий ускуналар билан жиҳозлаш учун 17 миллион доллар йўналтириши маълум бўлганди.
Изоҳ (0)