Бугун (20 июль куни) олий таълим муассасаларининг бакалавриат таълим йўналишларига кириш тест синовларида иштирок этиш учун абитуриентларни рўйхатга олиш якунланади. Бу ҳақда Билимни баҳолаш агентлиги маълум қилди.
Фото: “Дарё” / Мадина Нурман
Абитуриентлар бугун соат 23:59 га қадар my.uzbmb.uz ёки my.gov.uz сайтлари орқали онлайн рўйхатдан ўтишлари ёки танлаган таълим йўналишларини ўзгартиришлари мумкин.
Тўловдан озод қилинганлар тоифасига кирмайдиган абитуриентлар 21 июль куни соат 23:59 гача тўловни амалга оширишлари мумкин бўлади.
Сўнгги маълумотларга кўра, 19 июль соат 20:00 ҳолатига ОТМларга кириш учун 882 913 нафар абитуриент онлайн рўйхатдан ўтган. Энг кўп рўйхатдан ўтган абитуриентлар Қашқадарё вилояти (103 минг 972 нафар) ҳиссасига тўғри келмоқда. Кейинги ўринлардан Самарқанд (99 210 нафар), Фарғона (83 409 нафар), Тошкент (76 884 нафар) ва Сурхондарё (72 883 нафар) вилоятлари жой олган.
Энг кўп абитуриент рўйхатдан ўтган ОТМлар (биринчи таълим йўналишига нисбатан):
- Ўзбекистон миллий университети — 32 630 нафар;
- Фарғона давлат университети — 26 250 нафар;
- Тошкент давлат транспорт университети — 26 136 нафар;
- Тошкент давлат педагогика университети — 25 473 нафар;
- Тошкент ахборот технологиялари университети — 24 936 нафар.
Таълим шакллари бўйича таққослаганда абитуриентларнинг 530 195 нафари кундузги, 324 213 нафари сиртқи, 21 861 нафари кечки ва 6 644 нафари масофавий таълим шаклига кириш учун ҳужжат топширган.
Изоҳ (0)