Тошкент шаҳар ҳокимининг фармойиши билан Келес йўли кўчаси вақтинча ёпилди, деб хабар беради пойтахт ҳокимлиги матбуот хизмати.
Маълум қилинишича, Олмазор тумани Келес йўли кўчасини кенгайтириш ва реконструкция қилиш ҳамда атрофини ободонлаштириш ишлари амалга оширилмоқда. Шу муносабат билан, Тошкент шаҳар ҳокимининг 2023 йил 18 июлдаги 147-14-0-Ф/23-сонли фармойишига асосан, 19 июль соат 20:00 дан 30 август кунига қадар Келес йўли кўчасининг Норазтепа кўчаси билан кесишмасидан Узумбоғ кўчаси билан кесишмасигача бўлган оралиғи барча турдаги транспорт воситалари ҳаракати учун ёпилди.
“Ҳайдовчилардан ноқулайликлар учун узр сўраб, айланма йўллардан фойдаланишларини тавсия этамиз”, — дейилади хабарда.
Бунга қадар велоспортнинг шоссе тури бўйича Оқтош—Чорбоғ Mountаin халқаро мусобақаси ўтказилиши муносабати билан 10 ,11, 13, 14 май кунлари соат 08:00 дан 17:00 га қадар Тошкент вилоятининг Бўстонлиқ ва Юқори Чирчиқ туманларидан ўтган автомобиль йўллари вақтинчалик ёпилганди. 19 февраль куни эса “Мен ғолиб” оммавий югуриш мусобақаси ўтказилиши муносабати билан Тошкентнинг қатор кўчаларида автомобиллар ҳаракатланишига вақтинчалик чеклов қўйилганди. Тошкентда марафон ўтказилиши муносабати билан 5 март куни бир қатор кўчалар ёпилган эди.
Изоҳ (0)