Sirdaryo viloyati bojxona boshqarmasining tezkor tuzilmalari tomonidan DXX bilan hamkorlikda o‘tkazilgan tezkor tadbirda O‘zbekiston “Qizil kitob”iga kiritilgan lochinlarni ona tabiatdan ajratib olib, pullashga uringan shaxslar to‘xtatib qolindi. Bu haqda Davlat bojxona qo‘mitasi matbuot xizmati “Daryo”ga ma’lum qildi.

Foto: Davlat bojxona qo‘mitasi

Tezkor tadbir davomida avvaldan kuzatuvga olingan shaxs boshqaruvidagi “KamAZ” yuk avtotransport vositasi “Sirdaryo” chegara bojxona postida to‘xtatilib, belgilangan tartibda ko‘zdan kechirilgan. Tekshiruv davomida salondagi sport sumkasiga 8 ta lochin yashirilgani fosh bo‘lgan.

“Boz ustiga qushlarga shafqatsizlarcha munosabatda bo‘lingan, jonzotlar sumkaga ularning hayoti uchun xavfli tarzda zichlab joylashtirilgan”, — deyiladi xabarda.

Shu kuni tezkor tadbir Sirdaryo tumanida ham davom ettirilib, ushbu qushlarni sotib olayotgan shaxs ham qo‘lga olingan.

Ma’lumot uchun, ushlab qolingan 8 ta lochin O‘zbekistonning 2019-yilda chop etilgan “Qizil kitob”iga kiritilgan va tabiatan kamyob hisoblanadi, ularni ovlash taqiqlangan. Lochinlarning 6 tasi “Qizil kitob”їga itolg‘i nomi bilan kiritilgan bo‘lib, ular tobora yo‘qolib borayotgan tur hisoblanadi.

Surishtiruvlar davomida ma’lum bo‘lishicha, qonunbuzarlar ushbu qushlarni 280 million so‘mga pullamoqchi bo‘lgan. Hozirda lochinlar Toshkent hayvonot bog‘iga vaqtincha saqlovga topshirilgan va mutaxassislarning doimiy nazorati ostida parvarishlanmoqda.

Holat yuzasidan esa bojxona organlari tomonidan surishtiruv harakatlari davom ettirilmoqda.

Avvalroq Bekobodda narxi 150 ming dollargacha baholanuvchi 7 bosh noyob lochinni O‘zbekistondan olib chiqib ketmoqchi bo‘lgan shaxs ushlangani to‘g‘risida xabar berilgandi.