Пенсия жамғармаси болалар нафақаси ва моддий ёрдам олаётганлар ҳақида маълумот берди

Ҳозирда 2 миллион 200 минг оилага болалар нафақаси ва моддий ёрдам тўлаб келинмоқда.

Пенсия жамғармаси январь–июнь ойлари давомида амалга оширилган ишлар ҳақида ҳисобот берди.

Маълум қилинишича, жорий йил 1 июль ҳолатига умумий пенсия ва нафақа олувчилар сони 4 миллион 470 минг 29 нафарга етди. Ўтган 6 ой ичида 201 минг 216 нафар фуқарога янги пенсия ва нафақалар тайинланди.

Ижтимоий ҳимоя ягона реестри орқали 16 та вазирлик ва идоралар билан 53 турдаги ахборот алмашинуви йўлга қўйилди. Болалар нафақаси ва моддий ёрдам тайинлаш учун фуқаролардан тақдим этилган 2,6 миллионта аризалар реестр тизимига киритилиб, мезонга мувофиқлиги автоматик равишда кўриб чиқилиши ва 1,3 миллионта оилага нафақа ва моддий ёрдам тайинланиши таъминланди”, —дейилади жамғарма ҳисоботида.

Ҳисоб-китобларга кўра, ҳозирги кунда Ўзбекистонда 2,2 миллион оилага болалар нафақаси ва моддий ёрдам тўлаб келинмоқда.

Жамғарма томонидан пенсияни ҳисоблаш учун иш ҳақининг максимал миқдори пенсияни ҳисоблаш базавий миқдорининг 10 баробаридан 12 баробарига оширилиши натижасида:

• 371 минг нафар фуқаронинг пенсия миқдорлари қайта ҳисобланди;
• 2023 йилда қайта ҳисобланган пенсия миқдорларини тўлаб бериш учун 1,6 триллион сўм ажратилди.