Surxondaryo viloyatidagi ovchilik xo‘jaligi hududida rossiyalik ovchi Qizil kitobga kiritilgan Marhur echkisini ovladi. Tabiat resurslari vazirligi axborot xizmati holat yuzasidan munosabat bildirdi.
Ma’lum qilinishicha, yovvoyi hayvonlarni, jumladan, Qizil kitobga kiritilgan hayvonlarni ovlash uchun 2022-yilgi tasdiqlangan kvotaga muvofiq Rossiya fuqarosi Sergey Mazurkevichga Marhur echkisini ovlash uchun 23-noyabr kuni ruxsatnoma berilgan.
Ovchilik hududiy ekologiya va atrof-muhitni muhofaza qilish boshqarmalari inspeksiyasi nazorati ostida ov qilish uchun berilgan ruxsatnoma ro‘yxatga olingan. Ov tugagach, viloyat ekologiya inspeksiyasi vakili tomonidan ovlangan hayvonga dalolatnoma tuzilgan.
Ushbu hayvonlarni ovlash narxlari “Ov qilish va ov xo‘jaligi to‘g‘risida”gi O‘zbekiston Respublikasi qonuni 1-ilovasida belgilangan. O‘lja olish maqsadida ov qilishda, asosan, qonun bilan taqiqlanmagan qurollardan (miltiq karabinlari va zamonaviy optikalar)dan foydalaniladi.
O‘lja olish maqsadida ovni tashkil etish va o‘tkazish uchun olingan mablag‘lar yovvoyi hayvonlar populyatsiyasini muhofaza qilish, biotexnik tadbirlarni o‘tkazish va ijtimoiy ahamiyatga molik loyihalarni moliyalashtirish, shu jumladan, yovvoyi hayvonlarning noyob turlarini ko‘paytirish bo‘yicha pitomniklar qurish, mustaqil xalqaro ekspertlarni jalb qilish, yovvoyi hayvonlarni ro‘yxatga olish uchun ajratiladi.
Izoh (0)