Тошкентнинг Шайхонтоҳур тумани Лабзак кўчасидаги янги 10 қаватли уйнинг томида қўшимча уй қурилгани аниқланди. Ҳолатга Қурилиш ва уй-жой коммунал хўжалиги вазирлиги муносабат билдирди.
Маълум қилинишича, 10 июль куни Қурилиш ва уй-жой коммунал хўжалиги соҳасида назорат қилиш инспекция мутахассислари томонидан юқорида келтирилган манзил ўрганилган ва 96-хонадон мулкдори кадастр ҳужжатларида мавжуд бўлган мансарданинг ён қисмига ўзбошимчалик билан қўшимча қурилма қуриб олгани аниқланган.
Туман ҳокимлиги матбуот хизмати хабарига кўра, ушбу қўшимча қурилмани қуриш ишлари фуқаро А.Р. томонидан уйнинг том қисмини ўзбошимчалик билан эгаллаб олган ҳолда, рухсат берувчи ҳужжатларсиз олиб борилган.
Инспекция томонидан ўз ваколати доирасида фуқарога 15 кун ичида, яъни 25 июлгача қурилмани бартараф этиш бўйича мажбурий кўрсатма берилган. Шунингдек, Маъмурий жавобгарлик тўғрисидаги кодекснинг 159-моддасига асосан маъмурий жарима қўлланган.
“Таъкидлаш лозимки, мазкур ўзбошимчалик билан қурилган қурилмага нисбатан Инспекция мутахассислари томонидан қонунда белгиланган ваколатлар доирасида чора кўрилган. Тартибга кўра белгиланган мажбурий кўрсатма талаблари фуқаро томонидан бажарилмаган тақдирда Фуқаролик ишлари бўйича судга мажбурий тартибда бартараф этиш тўғрисида даъво аризаси киритилади”, — дейилади вазирлик хабарида.
Тошкентда шу каби ҳолат февраль ойида ҳам қайд этилганди. Янгиҳаёт туманида мулкдорлар 10 қаватли уй томига уй қуриб олгани аниқланган. Уларга нисбатан маъмурий чора кўрилиб, ноқонуний қурилмаларни 15 кун ичида бартараф этиш бўйича кўрсатмалар берилган.
Изоҳ (0)