“Теракт ортида ким турганини биламиз”. Кремль Қрим кўпригидаги портлашга муносабат билдирди

Россия президентининг матбуот котиби Дмитрий Песков Россиянинг барча тегишли хизматлари ва идоралари Қрим кўпригидаги портлашдан сўнг эҳтимолий янги ҳужумларга тайёр эканини айтди. Бу ҳақда Meduza хабар бермоқда.

“Албатта, барча тегишли хизматлар, бўлимлар, ҳаммаси ишлаяпти. Биз Киев режимининг маккорлигидан хабардормиз. Бугун Киев режими Қрим кўпригида ёш оилани, бир қизнинг ота-онасини ўлдирди, қизнинг ўзи ярадор бўлди. Бу ҳақда ҳамма билиши учун гапириш керак, буларнинг барчаси Киев режимининг иши. Бундай фожиалар такрорланмаслиги учун барчамиз ишлаймиз ва диққатимизни жамлаймиз”, — деди Песков матбуот брифингида. Унинг сўзларидан “Интерфакс” иқтибос келтирди.

Песковнинг сўзларига кўра, “махсус ҳарбий операция”нинг мақсадлари орасида Қрим кўпригидаги портлашга жавоб ҳам бўлади.

Унинг қўшимча қилишича, Россия президенти Владимир Путин 17 июль куни кечқурун Қрим кўпригидаги вазият бўйича йиғилиш ўтказади, унда президент видеоалоқа орқали бош вазир ўринбосари Марат Хуснуллиннинг Қрим кўпригидаги вазиятни тиклаш бўйича ишларни ташкил этиш ҳақидаги ҳисоботини тинглайди.

Кремль матбуот котибининг қўшимча қилишича, Россияда доимий равишда қўшимча хавфсизлик чоралари кўрилмоқда.

“Биз бу теракт сабаблари ва унинг ортида кимлар турганини биламиз. Бу биздан янада совуққонлик, қўшимча чора-тадбирлар ва қўшимча меҳнат талаб қилади”, — деди Песков.

Қрим кўпригидаги портлашдан сўнг Россия Хавфсизлик кенгаши раҳбари ўринбосари Дмитрий Медведев “террорчилар... фақат куч тилини, фақат шахсий ва мутлақо ғайриинсоний усулларни тушунади”, деди. Медведев “террорчилар” ва “уларнинг қариндошларининг уйлари”ни портлатиб юборишга чақирди.

17 июлга ўтар кечаси Қрим кўпригида портлаш содир бўлди. Россия расмийларининг даъво қилишича, Украинанинг ер усти учувчисиз учоқлари кўприкка ҳужум қилган, оқибатда икки киши ҳалок бўлган, 14 ёшли бола жароҳатланган. Россия Тергов қўмитаси “Теракт” моддаси бўйича иш қўзғатди, Украина махсус хизматлари портлашни уюштирганликда гумон қилинмоқда. Украина ОАВ манбаларининг айтишича, бунинг ортида Украина Хавфсизлик хизмати ва Украина денгиз флоти турибди. УХХ портлаш ҳақида батафсил маълумотни “Украинанинг урушдаги ғалабасидан кейин” беришини айтган.