Наманган вилоятида моддий манфаатдорлик эвазига ноқонуний диний сабоқ бериш ҳолатлари аниқланди.
Келтирилишича, Давлат хавфсизлик хизматининг Наманган вилояти бўйича бошқармаси ҳамда вилоят ички ишлар бошқармаси ходимлари ҳамкорлигида ўтказилган тезкор тадбирлар давомида яширин “ҳужралар” ташкил этиб, диний таълим бериш йўли билан ноқонуний даромад топаётганларнинг қилмишлари фош этилди.
Жумладан, Наманган шаҳрининг Балиқчи кўчасида яшовчи фуқаро кўп қаватли уйларнинг бирида 15 нафар шахсга диний сабоқ берган бўлса, “Маърифат” маҳалласида яшовчи аёл ўз хонадонида 14 нафар вояга етмаган болага диний ўқиш ташкил этиб, уларнинг ҳар биридан ойига 1,5 миллион сўмдан пул олиб келган.
Янги Наманган туманида қайд этилган ҳолатда эса фуқаро яширин “ҳужра”да 10 нафар вояга етмаган қизларга ва 3 нафар фуқарога диний таълим бериб келган.
Айни шу каби ҳолат Уйчи туманида ҳам кузатилиб, унда 48 ёшли фуқаро ўз уйида вояга етмаган болаларни тўплаб, моддий манфаат эвазига диний сабоқ бериш билан шуғулланган.
Таъкидланишича, бундай қонунбузарликлар Тўрақўрғон ва Наманган туманларида яшовчи 2 нафар шахс томонидан ҳам содир этилган.
Қилмишлари фош бўлган барча фуқаролар ҳамда болаларни тарбиялаш мажбуриятларини бажармаган ота-оналарга нисбатан амалдаги қонунчиликда назарда тутилган чоралар кўрилди.
ДХХ Сурхондарё вилояти Бойсун туманида ҳужра ташкил қилиб, болаларни қийноққа солиб келган йигит қўлга олинганини ҳам хабар қилганди. Унга нисбатан жиноят иши қўзғатилиб, процессуал тартибда қамоққа олинган. Фарғона вилоятининг Ёзёвон, Қўштепа, Данғара, Фарғона туманларида ҳам болаларга ҳужра шароитида ноқонуний диний сабоқ берганлар қўлга тушганди.
Изоҳ (0)