Европа Иттифоқи ва Тунис ноқонуний миграцияни тўхтатиш бўйича муросага эришди

Ўрта Ер денгизи орқали Европа Иттифоқига ўтиш учун хавфли уринишлар қилаётган муҳожирлар сони ортиб бориши фонида Брюссель ва Тунис ноқонуний миграцияга қарши биргаликда курашни кучайтиришга қарор қилди. Тегишли ҳужжат имзолангани ҳақида 16 июль куни Еврокомиссия раҳбари Урсула фон дер Ляйен, Италия ва Нидерландия бош вазирлари Марк Рютте ва Жоржа Мелони ҳамда Тунис президенти Кайс Саид маълум қилди. 

Ушбу келишувга кўра, Европа Иттифоқи оғир иқтисодий аҳволга тушиб қолган Шимолий Африка давлатига 900 миллион евро миқдорида молиявий ёрдам кўрсатади. Европа сиёсатчилари иштирокида ушбу келишув бўйича музокаралар тахминан бир ой олдин Тунисда бўлиб ўтган. Ўз навбатида, Тунис ноқонуний миграцияга фаол қаршилик кўрсатиш ва контрабандачиларнинг ўз қирғоқларидан Европага боришга уринишини тўхтатиш мажбуриятини олди. 

“Яхши келишувлар пакетини туздик. Энди уларни амалда қўллашимиз керак”, — деди Урсула фон дер Ляйен.

Саид эса келишувларни “имкон қадар тезроқ” амалга оширишга ваъда берди. У ноқонуний миграция атрофидаги вазиятни “ғайриинсоний” деб атади ва бу муаммони биргаликда ҳал қилиш мумкин, деган фикрни билдирди. 

Европа Иттифоқининг пуллари нимага сарфланади?

ЕИ маблағларидан 100 миллион евро денгизда муҳожирларни қидириш ва қутқариш, шунингдек, уларни ўз ватанига қайтариш учун йўналтирилиши режалаштирилмоқда. Бу сумма шу пайтгача Тунисга Европа бюджетидан ушбу мақсадлар учун ажратилган ўртача йиллик маблағдан уч баравар кўп.

Қайд этилишича, жорий йилда Европа Иттифоқига Ўрта Ер денгизи орқали келган ноқонуний муҳожирлар сони кескин ошган. Кўпчилик учун Тунис транзит нуқтаси ҳисобланади. Муаммо, айниқса, Италия учун кескин. Йил бошидан буён у ерда денгиз орқали мамлакатга келган 75 минг муҳожир рўйхатга олинган. Бу кўрсаткич ўтган йилнинг шу даврида 31,9 минг эди. 

Италия бош вазири Жоржа Мелони ЕИ Шимолий Африканинг бошқа давлатлари билан Тунис келишувига ўхшаш шартномалар туза олишига умид қилаётганини айтди.

Айни пайтда Тунисга пул ўтказилиши учун яна бир масала бўйича ижобий қарор қабул қилиниши керак. Мамлакат ҳалигача Халқаро валюта жамғармаси ваъда қилган 1,9 миллиард долларлик кредитни олмаган, чунки президент Саид зарур ислоҳотларни амалга ошириш бўйича мажбуриятларни ўз зиммасига олмаяпти, деб эслатади дпа агентлиги.