Twitter Маскнинг умидларини оқламади: реклама тушуми 50 фоизга камайди

SpaceX ва Tesla компаниялари асосчиси, америкалик миллиардер Илон Маскнинг айтишича, Twitter’нинг пул оқими манфий кўрсаткичда, чунки рекламадан тушган даромад 50 фоизга камайган.

Reuters маълумотларига кўра, Twitter пул оқими рекламадан тушум камлиги ва оғир қарз юки туфайли манфий бўлиб қолмоқда, бу эса Маскнинг Twitter’ни мартдан июнь ойига қадар мусбат пул оқимига ўтказиш ҳақидаги кутилмаларига мос келмайди.

Маск Twitter июнь ойида кутилган реклама даромадига эришмаганини тасдиқлади ва “июль бир оз истиқболли”, деб қўшимча қилди. Маскнинг сўзларига кўра, Twitter Spaces ҳам ҳали даромад келтирмаган — у тўлиқ пуллик.

Бу Маск Twitter’ни октябрь ойида сотиб олганидан бери харажатларни қисқартириш бўйича агрессив чоралар компанияни мусбат пул оқимига олиб кириш учун етарли эмаслигига исбот бўлди.

Маскнинг таъкидлашича, минглаб ходимларни ишдан бўшатиб, онлайн тўловларни қисқартиргандан сўнг, компания 2023 йилга режалаштирилган 4,5 миллиард доллар харажатларини 1,5 миллиард долларгача қисқартирган. Шу билан бирга, Twitter қарз туфайли йилига 1,5 миллиард долларга яқин фоиз тўловларига дуч келмоқда.

2023 йилнинг июль ойида Twitter фойдаланувчилари янги Threads ижтимоий тармоғига ўтишни бошлади. Threads’да аллақачон 100 миллион фойдаланувчи рўйхатдан ўтган.