Жиззах вилояти ҳудудидан ўтувчи “Манас” йўл-патрул хизмати масканида ЙПХ инспекторлари узоқ масофага ҳаракатланувчи ҳайдовчилар учун кофе-бреклар ташкил этмоқда. Бу ҳақда Давлат йўл ҳаракати хавфсизлиги хизмати эълон қилган видеолавҳада айтилган.
Жиззахда тунги вақтда узоқ масофага ҳаракатланаётган ҳайдовчиларга кофе ва салқин ичимликлар улашилмоқда. Вилоят ЙҲХБ катта инспетори Аббос Дадашевнинг айтишича, бундан мақсад йўл-транспорт ҳодисаларини олдини олишдан иборат.
“Чарчоқ аломатлари билан рул бошқариш ёки чарчаган бўлса-да автомобиль ҳайдаш оқибатида йўл-транспорт ҳодисаси содир этиш ҳолатларининг олдини олиш мақсадида ‘Манас’ йўл-патрул хизмати масканида ЙПХ инспекторлари томонидан узоқ масофага ҳаракатланувчи ҳайдовчиларга кофе-бреклар ташкил этилмоқда. Шунингдек, уларга узоқ масофага ҳаракатланаётган вақтда йўл қоидаларига риоя этиш, чарчоқ аломатлари сезилганда эса тўхтаб дам олиш бўйича профилактик суҳбатлар олиб борилмоқда”, — деди у.
Маълумот учун, Ўзбекистонда 2022 йил давомида жами 9 минг 902 та ЙТҲ содир бўлган. Бунининг оқибатида 2 минг 356 киши вафот этган, 9 минг 606 киши турли даражаларда жароҳатланган.
Изоҳ (0)