Мактабгача ва мактаб таълими вазирлиги имтиҳонни олдиндан топширганлар дарсларга бормаслиги мумкинлиги тўғрисидаги хабарларни рад этди.
Қайд этилишича, бу хабарлар мактабни ўз вақтида тугата олмаганларнинг экстернат тартибида имтиҳон топшириш учун аризалар бериш билан боғлиқ хабарнинг нотўғри талқин қилингани натижасида тарқатилган.
Экстернат тартибидаги имтиҳонлар учун аризалар Ягона интерактив давлат хизматлари портали орқали онлайн топширилади, натижа 2 кунда фуқарога маълум қилинади, давлат хизмати бепул амалга оширилади.
Шунингдек:
- фуқаро фақат баҳолар табели ва маълумотномани электрон шаклда топширади (аввал ҳужжатлар сони 5 та бўлган);
- аризалар 2 кунда кўриб чиқилиб, натижаси фуқарога онлайн юборилади.
Якуний давлат аттестасиясидан муваффақиятли ўтган фуқароларга давлат намунасидаги шаҳодатнома берилади. Ушбу давлат хизмати жорий йилнинг 1 мартидан ишга туширилади ва 1 майга қадар давом этади.
“Таълим тўғрисида”ги қонунга мувофиқ, фуқароларнинг умумий ўрта таълим олиш ҳуқуқини таъминлаш мақсадида экстернат тартибида имтиҳонларда фақат ўз вақтида турли сабабларга кўра умумий ўрта таълимни якунлай олмаган, аниқроқ айтганда, мактабни тўлиқ битирмаган 18 ёшдан ошган фуқаролар иштирок этади.
Экстернат тартибидаги имтиҳонларнинг мактабда таълим олаётган ўқувчиларга алоқаси йўқ ва уларга татбиқ этилмайди.
Изоҳ (0)