Тошкент шаҳрининг Яккасарой туманида Миллий гвардия “Қўриқлаш” бўлимининг тезкор ҳаракатланувчи гуруҳи ходимлари аёлга таҳдид қилган эркакни ушлади. Бу ҳақда идора матбуот хизмати хабар берди.
Қайд этилишича, ходимлар хизмат вазифасини бажараётиб, Салор канали ёнида бир эркак ва бир аёлга дуч келган. Ушбу икки нафар фуқаронинг баланд овоздаги мулоқоти ва имо-ишораларига кўра ўртада можаро келиб чиққани аён бўлган.
Шундан сўнг, фуқароларга яқинлашган ходимлар эркак аёлга қўлидаги тиғли буюм билан таҳдид қилаётганига гувоҳ бўлган. Фуқаро зудлик билан қўлга олиниб, аёл билан бирга вазиятга ойдинлик киритиш мақсадида энг яқин ички ишлар бўлимига олиб кетилган.
Ҳозирда мазкур ҳолат юзасидан Яккасарой тумани ИИБ томонидан терговга қадар текширув ҳаракатлари олиб борилмоқда.
Май ўрталарида Президент томонидан имзоланган қонун билан Маъмурий жавобгарлик тўғрисидаги кодексга ўзгартиришлар киритилганди. Унга кўра, Миллий гвардия органлари ходимларига майда безорилик, совуқ қурол ёки совуқ қурол сифатида фойдаланилиши мумкин бўлган ашёларни олиб юриш, вояга етмаган шахсни маъмурий ҳуқуқбузарлик содир этишга, ғайриижтимоий хатти-ҳаракатларга жалб қилиш, жамоат жойларида алкогол маҳсулотларини истеъмол қилиш каби маъмурий ҳуқуқбузарликлар бўйича ишларни кўриб чиқиш, баённомалар тузиш ва уларни кўриб чиқиш учун судга юбориш бўйича қўшимча ваколатлар берилган.
Изоҳ (0)