Ўзбекистон фуқароси ҳеч қандай ҳужжатсиз Ҳиндистонга Непалдан киришга уринаётганда ушланди. Бу ҳақда “Дунё” АА хабар берди.
Қайд этилишича, куни кеча Ҳиндистоннинг айрим ОАВда ушбу давлатга Биҳар штатидаги Ситамарҳи туманида Непалдан ноқонуний тарзда киришга уринаётганда ушланган Ўзбекистон фуқароси ҳақида маълумот тарқатилди. Маълум қилинишича, ўзини Ўзбекистон фуқароси деб таништирган Х.М. исмли кишининг ёнида амалдаги паспорти ёки шахсни тасдиқловчи бошқа ҳужжатлари бўлмаган.
“Дунё” АА хабарига кўра, Ўзбекистоннинг Деҳлидаги элчихонаси ушбу масалага ойдинлик киритиш мақсадида тезкор чора-тадбирлар кўрмоқда. Шу мақсадда Ҳиндистоннинг тегишли маҳкама ва идоралари билан алоқа ўрнатилиб, мазкур вазият назоратга олинди.
Дипломатик миссия ўзбекистонликларни Ҳиндистонга сафар қилишдан олдин турли шубҳали гуруҳ ёки шахсларнинг ёлғон ваъдаларига алданиб қолмаслик, ушбу мамлакатга кириш ва унда бўлиб туриш чоғида маҳаллий қонунчилик талабларига қатъий риоя қилишга чақирди.
Элчихона бундай ҳолатлар юзага келган тақдирда зарур консуллик-ҳуқуқий ёрдами кўрсатилиши учун зудлик билан қуйидаги воситалар орқали мурожаат қилишни тавсия қилди: Телефон: +91 11 2467 0774/75, Telegram-бот: @consuluzbindia_bot.
Ҳиндистон ОАВ тарқатган хабарга кўра, йил бошидан бери 10 дан ортиқ давлатнинг камида 35 нафар фуқароси Непал—Ҳиндистон чегарасини ноқонуний кесиб ўтишга уринаётган пайтда қўлга олинган.
Изоҳ (0)