Россия “Вагнер” жангарилари қиймати қарийб 4 миллиард долларлик Қрим кўпригига ҳужум уюштиришни режалаштираётганидан хавотирда. Бу ҳақда Daily Mail хабар берди.
Қрим яриморолига саёҳат учун йўл олган сайёҳлар етти соатгача навбатда туради, чунки хавфсизлик ходимлари ҳар бир машинани портловчи модда эҳтимолига текширади. Дам олиш кунларида Россия томони интенсив текширувлар ўтказган.
Москва “Вагнер” амалда тарқатиб юборилганидан кейин унинг аскарлари ҳужум режалаштириши мумкинлигидан қўрқиб, шай ҳолатда экани айтилмоқда.
“Россия 2022 йил октябрь ойида ҳужумга учраган ‘аср тузилмаси’ ҳисобланган Қрим кўприги ‘Вагнер’ нишонига айланишидан хавотирда. ‘Вагнер’ жангчилари ғазаби сабабли ҳужум уюштириши, Путин исённи тўхтатиш эвазига Пригожин билан эришилган келишувни бузиши мумкинлигидан хавотир бор”, — дейилади хабарда.
InformNapalm халқаро разведка ҳамжамияти ҳам Қримдаги эҳтимолий диверсия (қўпорувчилик) ҳақида огоҳлантирган.
Россия хавфсизлик ходимларининг текширувлари шу даражага етдики, улар болаларни ва машиналарнинг ички қисмларини текширишни бошлади. Пригожиннинг исёнидан сўнг унинг жангчиларининг бир қисми Беларусга, қолганлари эса Россия армиясига қўшилиши кутилмоқда.
Беларусга кўчиш Кремль ва Пригожин ўртасидаги “Вагнер” исёнини жиноий оқибатларсиз тугатиш бўйича келишувнинг бир қисми эди. Беларусь аллақачон ёлланма аскарлар учун “чодирлар тайёрлаб қўйган”.
“Вагнер жангчиларининг кўпчилиги ўзларига берилган танловдан ва хусусий ёлланма гуруҳнинг йўқ қилинганидан норози”, — дейилади хабарда.
Қрим нафақат “Вагнер”, балки Украина учун ҳам потенсиал нишонга айланади. Яриморол ҳозирда Буюк Британия томонидан тақдим этилган Storm Shadow ракеталарининг радиуси ичида жойлашган, бироқ сайёҳлар пляжлар хандаққа айланганига қарамай, у ерга дам олиш учун бормоқда.
Изоҳ (0)