2020 йил 1 августдан бошлаб истеъмол товарларининг айрим турлари ишлаб чиқарувчи томонидан давлат тилида лотин ёзувига асосланган ўзбек алифбосида маркировка қилинмаган тақдирда уларга мувофиқлик сертификатини расмийлаштириш тақиқланади, деб хабар бермоқда Norma.
2013 йил 1 июлдан бошлаб рўйхат бўйича олиб келинадиган импорт истеъмол товарлари ўзбек тилида маркировка қилиниши лозим. Товарлар ишлаб чиқарувчи корхона томонидан маркировка қилинади. Бунда товарларнинг турига қараб маркировка қилиш усуллари ва унда акс эттириладиган маълумотлар танлаб олинади.
Қайд этилишича, 2018 йил 1 сентябрдан товарларнинг бундай мажбурий маркировкасиз «эркин муомалага чиқариш (импорт)» режимига расмийлаштиришга рухсат берилган. Бироқ шу билан бирга, Ўзбекистонга олиб кириладиган бир қатор товарлар мажбурий тартибда сертификатлаштирилиши лозим. 2020 йил 1 августдан бошлаб товарлар мажбурий сертификатланадиган бўлса, уларда мажбурий тартибда давлат тилидаги маркировканинг мавжуд бўлиши мазкур товарларга мувофиқлик сертификатини расмийлаштириш шарти ҳисобланади.
Шунга кўра, бундай товарларни божхонада расмийлаштиришда маркировка талаб этилмаса ҳам сертификатланган маҳсулотларнинг белгиланган талабларга мувофиқлигини тасдиқлайдиган ҳужжатсиз реализация қилиш савдо қоидаларини бузиш ҳисобланади ва бу ҳолат турли оқибатларга олиб келиши мумкин. Бунда товарлар сотувга чиқарилмайди (Ўзбекистонда чакана савдо қоидаларининг 189-банди, Маъмурий жавобгарлик тўғрисидаги кодекснинг 164-моддаси, Жиноят кодексининг 189-моддаси).
Илгаригидек, истеъмол қадоқлари бўлмаган товарларга нисбатан ва қонун ҳужжатларида назарда тутилган бошқа ҳолатларда давлат тилида маркировка қилиш талаб этилмайди.
Изоҳ (0)