Фарғона вилояти Қувасой шаҳрида 23 ёшли банк ходими қарийб 50 кишининг нафақа пулини ўзлаштиргани аниқланди. Бу ҳақда “Бу Кун” дастурида хабар берилди.
Унга кўра, 23 ёшли йигит шаҳардаги банкларнинг бирида ғазначи сифатида ишлаб келган. У 4 йил давомида ушбу лавозимда фаолият юритиб келган. Унинг сўзларига кўра, нафақаларни тезроқ топшириш бўйича топшириқ олгани сабабли шахсий машинасида тарқатишига тўғри келган. Дастлаб 15-20 миллион сўм ўзлаштирган бўлса, бугунги кунда 40 миллион сўмга етган. У 48 нафар фуқаронинг жами 40 млн дан ортиқ ёшга доир нафақа пуллари ва болалар пулларини ўзлаштирган.
“Машинада етишмовчилик бўлар эди. 2 та Damas бор эди. Ўзимизнинг шахсий машиналарда юриб тарқатганимизда касса ҳисобланганда 15-20 млн га яқин камомад аниқланди. Кейин уни тўғирлаш учун базадан уриб, тўғрилаб, кассага чиқарганмиз. Аслида, шахсий автомобилда нафақа тарқатиш мумкин эмас, тезроқ тарқатиш топшириғини олганимиз учун шахсий машинада чиққанмиз. ъШапкаъ қилиб юрганимиз учун пуллар кўпайиб кетди, бошида 15-20 миллион эди, кейин 40 миллион сўм бўлиб кетди”, — дейди у.
Мазкур ҳолат юзасидан Қувасой шаҳар ИИБ ҳузуридаги тергов бўлинмаси томонидан Жиноят кодексининг 167-моддаси 2-қисми “г” банди билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)