Тошкент метросида икки йигит нотаниш қизга шилқимлик қилиб, ҳолатни видеога олди

Тошкент шаҳрида метро ичида икки йигит нотаниш қизга шилқимлик қилиб, ҳолатни видеога олди. ИИВ уларга нисбатан чора кўрилганини маълум қилди. 

Метрода нотаниш қизга шилқимлик қилган йигитларнинг шахси аниқланиб, Маъмурий жавобгарлик тўғрисидаги кодекснинг 41 прим 1-моддаси ва 46 прим 1-моддаси билан баённома расмийлаштирилди ҳамда чора кўриш учун суд органларига юборилди.

“Айбдорман, биз бу видеони чиқарганимиздан афсусдамиз. Бир кунда хато иш қилганимизни тушундик, узр сўраб қоламиз”, — дейди улардан бири.

Бир неча кун олдин Тошкент вилояти Янгийўл туманида яшовчи 19 ёшли йигит 10 кун давомида вояга етмаган қизни бўш уйда сақлаб, уни ўзи билан жинсий алоқа қилишга мажбурлаб келгани маълум бўлганди. Апрель бошида эса Хоразмдаги оилавий болалар уйи раҳбари уч нафар вояга етмаган тарбияланувчини 10 ой давомида вилоят адлия бошқармаси ва туман фавқулодда вазиятлар бўлими бошлиқлари билан жинсий алоқада бўлишга мажбурлагани маълум бўлганди. Адлия вазирлиги Жамоатчилик билан алоқалар бўлими ушбу ходим лавозимидан озод этилганини билдирган.