Сурхондарё ва Фарғонада оилавий корхоналар раҳбарлари 1,2 млрд сўмдан ортиқ имтиёзли кредитларни талон-торож қилди

Сурхондарё ва Фарғона вилоятларида имтиёзли кредит маблағларини талон-торож қилган оилавий корхона раҳбарларига нисбатан жиноят ишлари қўзғатилди. Бу ҳақда Бош прокуратура ҳузуридаги департамент хабар берди.

Қайд этилишича, департаментнинг Термиз шаҳар бўлими томонидан “Микрокредитбанк” АТБ Сурхондарё вилояти минтақавий филиалининг мурожаатига асосан терговга қадар текширув ўтказилган. Текширувда “Л.Т.” оилавий корхона раҳбари Х.Б. ва бошқалар тикувчиликни ривожлантириш учун ажратилган 622,9 миллион сўм имтиёзли кредит эвазига тикув дастгоҳларини олиб келмасдан, ушбу маблағларни ўзлаштириш йўли билан талон-торож қилгани аниқланган.

Шунингдек, банкнинг фронт-офис бўлими собиқ бошлиғи А.У. ушбу мақсадсиз ишлатилган кредит қарздорликларини тўлаш учун янги хўжалик юритувчи субъект ташкил этиб, банкдан кредит олиб бериш эвазига оилавий корхона раҳбари Х.Б.нинг 30 миллион сўм нақд пулини фирибгарлик йўли билан қўлга киритгани маълум бўлган.

Шу каби департаментнинг Фарғона туман бўлими томонидан ўтказилган терговга қадар текширувда “Ж.С.” оилавий корхона раҳбари Й.Қ. ва бошқалар ҳудудий тижорат банки филиалидан 23 нафар фуқарога иссиқхона қуриш ва чорва моллари етказиб бериш учун ажратилган 620 миллион сўм имтиёзли кредит маблағларини ҳужжатларни сохталаштириш йўли билан талон-торож қилгани аниқланган.

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 168-моддаси (фирибгарлик), 209-моддаси (мансаб сохтакорлиги) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.

Банк ходимлари билан боғлиқ жиноий ҳолатлар

“Ўзмиллийбанк” АЖнинг Сурхондарё вилояти Қумқўрғон туман филиали ходими саккиз ой давомида хориждан келаётган маблағларни 9 талик код орқали ўзлаштириб, шу муддат давомида банкнинг 170 минг долларини қўлга киритгани ва қиморда ютқазиб қўйгани хабар берилганди. Нукусда 9,2 млрд сўм пулни қиморда ютқазган банк ходими 8 йилга қамалгани, Гулистонда фуқаро раҳбарининг ярим млрд сўмдан зиёд пулини ўзлаштиргани аниқланганди.