Тошкент шаҳар Юнусобод туманида бинолар деворига наркограффитиларни чизиш билан шуғулланган шахс қўлга олинди. Бу ҳақда пойтахт ИИББ ахборот хизмати хабар берди.
Қайд этилишича, Юнусобод тумани ИИО ФМБга гиёҳвандлик воситалари ва психотроп моддаларни сақлаш ҳамда сотиш ҳолатларига чек қўйиш, шунингдек, уларни турли хил сайтлар орқали реклама қилаётган шахсларни аниқлашга қаратилган профилактик тадбирлар ўтказилган.
Тадбирлар давомида “Ҳасанбой” маҳалласининг профилактика инспектори Тикланиш кўчасида жойлашган бинонинг деворига гиёҳвандлик воситаларини сотувчи дўконларни тарғиб қилувчи наркограффитиларни чизаётган номаълум шахсни аниқлаб, қўлга олган. Аниқланишича, наркограффист 25 ёшли Ахтам Р. бўлиб чиққан. Ундан холислар иштирокида трафарет ва бўёқ қутиси ашёвий далил сифатида олиб қўйилган.
Мазкур ҳолат юзасидан тегишли ҳужжатлар расмийлаштирилиб, судга юборилган.
Гиёҳванд моддалар савдоси
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойида Тошкент шаҳрида гиёҳванд моддалари савдосига қарши “Долзарб 15 кунлик” бўлиб ўтаётгани маълум қилинганди. Бу давр мобайнида 1 775 тадан ортиқ наркограффит ёзувлар аниқланиб, барчаси ўчирилган.
Изоҳ (0)