Ҳалима Яқуб ўзбек компанияларини Сингапур ва Жануби-Шарқий Осиёдаги имкониятларни кўпроқ ўрганишга чақирди

Шавкат Мирзиёевнинг таклифига биноан Сингапур президенти давлат ташрифи билан Ўзбекистонда бўлиб турибди. Ҳалима Яқуб ташрифдан олдин “Дунё” агентлигига берган интервьюсида ўзбек компанияларига ўз тавсияларини берди.

Ҳалима Яқуб Сингапур президенти сифатида Ўзбекистонга илк давлат ташрифини амалга оширгани катта шараф эканини таъкидлаган.

“Ўзбекистон президентининг Сингапурга ташрифи чоғида ривожланиш соҳасидаги тажрибамизни ўртоқлашганимиздан хурсанд бўлдик. Ташрифим давомида Тошкентдаги Давлат бошқаруви академиясига бораман, ҳозир мазкур академияда Ли Куан Ю номидаги Сингапур давлат сиёсати мактаби, Фуқаролик хизмати коллежи билан раҳбарлик ва бошқарув бўйича дастурларни амалга ошириш масалалари муҳокама қилинмоқда. Умид қиламанки, масъул лавозимдорларга ушбу тренинг фойдали бўлади ва уларга ҳозирги ҳамда келажакдаги муаммоларни ҳал қилиш учун зарур бўлган билим ва кўникмаларни эгаллашларига кўмаклашади”, — дейди у.

Сингапур раҳбари президент Шавкат Мирзиёев билан икки мамлакат ўртасидаги иқтисодий алоқаларни мустаҳкамлаш йўлларини ҳам муҳокама қилганини маълум қилди.

“Ташрифим муносабати билан Сингапур бизнес делегацияси Тошкентда бўлиб турганидан мамнунман. Мен улар билан Ўзбекистон—Сингапур бизнес форумида учрашишни интиқлик билан кутмоқдаман”, — дейди Ҳалима Яқуб.

Унинг қайд этишича, ушбу бизнес форум уларга Ўзбекистон ҳукумати сиёсатини яхши тушуниш ҳамда мамлакатнинг, умуман, бутун Марказий Осиё имкониятларини ўрганиш учун қулай имконият яратади.

“Умумий режалаштириш, логистика, рақамли алоқа, таълим ва салоҳиятни ошириш каби турли соҳаларда Сингапурнинг бир қатор компаниялари Ўзбекистонда фаолият юритиб келмоқда. Мен ҳам, шунингдек, ўзбек компанияларини Сингапур ва Жануби-Шарқий Осиёдаги имкониятларни кўпроқ ўрганишга чақираман. Сингапур ўзбек компанияларига ASEAN минтақасини жалб этиш учун яхши базага айланиши мумкин, чунки биз бизнес ва транспорт маркази ҳисобланамиз”, — дейди Ҳалима Яқуб.

Шавкат Мирзиёев январь ойида Сингапурга буюрган давлат ташрифи чоғида Ўзбекистон—Сингапур ҳамкорлигининг олтита устувор йўналишини белгилаб берганди. Ўшанда устав капитали 500 миллион доллар бўлган Ўзбекистон—Сингапур инвестиция компаниясини ташкил этиш юзасидан келишувга ҳам эришилган.