Тошкент вилояти Ихтисослаштирилган соматика шифохонаси томонидан 15–22 май кунлари бошланғич қиймати 500 миллион сўмлик тендер ўтказилган. “Дарё” мухбири ҳужжатларни мониторинг қилиш давомида шубҳали ҳолатга дуч келди.
Тендер шифохонанинг терапия бўлимини таъмирлаш учун қурилиш моллари харид қилиш юзасидан бўлиб ўтган. Ғолиб корхона 10 кун ичида буюртмачига 29 турдаги маҳсулотни етказиб бериши керак.
Лотни ютиб олиш учун иккита корхона рақобатлашган. Комиссия аъзоларининг якуний баҳоларига кўра, Accountancy and Economic Services МЧЖ 85 балл билан тендер ғолиби деб топилган, “Gozal Binokent” МЧЖ эса 50 балл билан захира етказиб берувчи этиб белгиланган.
Статистика агентлиги маълумотларига кўра, ғолиб тадбиркорлик субъекти — Accountancy and Economic Services’нинг раҳбари Эгамқулов Бобиржон Олимбой ўғли ҳисобланади.
Эътиборлиси, тендер иштирокчиларининг натижаларини баҳолаган комиссия аъзолари ичида Умиров Олимбой Эгамқулович исмли шахс бор.
“Давлат харидлари тўғрисида”ги қонуннинг 46-моддасига кўра, иштирокчининг яқин қариндошлари ижрочини танлаш бўйича қарор қабул қилиш ҳуқуқига эга бўлса, иштирокчининг давлат харидларида иштирок этишига йўл қўйилмайди.
Хўш, Умиров Олимбой Эгамқулович ва Эгамқулов Бобиржон Олимбоевич ота ва ўғил ҳисобланадими? Ота ўз ўғлига тендерни ютишда ёрдам бердими?
Шу саволларга изоҳ олиш мақсадида Тошкент вилояти ихтисослаштирилган соматика шифохонаси ҳамда ғолиб корхона билан боғланишга уриндик. Шифохона телефон рақамларига қўнғироқ қилинганда гўшак кўтарилмади. Accountancy and Economic Services МЧЖ алоқа рақамларига қўнғироқ қилинганда келтирилган рақам тармоқда мавжуд эмаслиги маълум бўлди.
Яна бир қизиқ томони шундаки, комиссия аъзолари ичида шифохонанинг бош шифокори ҳисобланган Мажид Кенжаев ҳам бор.
Масъул ташкилотлардан ушбу тендер натижаларига эътибор қаратиб, ноқонуний ҳолатлар юзасидан тегишли чора кўришни сўраймиз.
Изоҳ (0)