Навоий вилояти ИИБ ижтимоий тармоқларда тарқалган Хатирчи туманидаги мактабларнинг бирида ўқувчилар ўртасида юз берган жанжал видеосига муносабат билдирди.
Маълум қилинишича, мазкур ҳолат юзасидан олиб борилган суриштирув ҳаракатлари давомида ҳолат 23 февраль куни соат 11:00 ларда 58-сонли мактабнинг 11-синф ўқувчилари ва 9-синф ўқувчилари ўртасида юзага келган келишмовчилик натижасида жанжал содир бўлгани аниқланган.
Бунинг оқибатида 11-синф ўқувчиси Ж.Л. ва 9-синф ўқувчиси А.И. енгил тан жароҳати олган.
Тегровга қадар текширув ҳаракатлари натижасида тўпланган ҳужжатларга кўра, ушбу жанжалда иштирок этган 13 нафар вояга етмаган мактаб ўқувчисининг ота-оналарига нисбатан Маъмурий жавобгарлик тўғрисидаги кодекснинг 47-моддаси билан тегишли ҳужжатлар расмийлаштирилиб, туман вояга етмаганлар комиссиясига юборилган ва баъзавий ҳисоблаш миқдорининг 1 (бир) баравари миқдорида жарима жазоси тайинланган.
Шунингдек, юқоридаги каби ҳолатлар келгусида такрорланмаслиги учун туман ИИБ ҳамда мактаб маъмурияти билан биргаликда ўқувчиларнинг ота-оналари билан ҳолат юзасидан муҳокама ташкил этилган.
Ўқувчилар ўртасида муштлашувлар
2022 йилнинг октябрида ижтимоий тармоқларда Наманганнинг Косонсой туманида мактаб ўқувчилари муштлашуви акс этган тасвирлар тарқалганди. Ноябрда эса Тошкентда ўқувчилар футболдаги жанжал сабаб муштлашиб кетган эди. Кейинроқ пойтахт ИИББ воқеага муносабат билдириб, мазкур ҳолат юзасидан Янгиҳаёт тумани ИИО ФМБ томонидан текширув ўтказилаётганини маълум қилган.
Шунингдек, Тошкентда мактаб ўқувчилари “Америка киносига тақлид қилиб” муштлашув уюштиргани, Хоразм вилояти Урганч туманида жойлашган икки мактаб ўқувчиси ўртасида жанжал содир бўлгани тўғрисида хабар берилганди.
Изоҳ (0)