Сурхондарё вилояти ҳокими Улуғбек Қосимов ва “Ўзбекгидроэнерго” акциядорлик жамияти раиси, сенатор Абдуғани Сангинов “Тўпаланг” ГЭСда якунланган модернизация ишлари билан танишди, деб хабар беради ЎзА.
Қайд этилишича, электр энергияси ишлаб чиқариш барқарорлигини таъминлаш учун Сариосиё туманидаги “Тўпаланг” ГЭС 75,4 миллион евро маблағ эвазига модернизация қилиниб, замонавий технологиялар билан жиҳозланган. Сўнгги синов ишлари олиб борилаётган шу кунларда гидроэлектр станцияси 64 мегаватт электр энергияси ишлаб чиқариб, тармоққа узатмоқда. Бу энергия воҳадаги 36 мингдан ортиқ хонадонни экологик тоза электр энергияси билан таъминлаяпти.
Синов ишлари тўлиқ якунлангач, гидроэлектр станция тўла қувват билан ишга туширилиб, 175 мегаватт электр энергияси ишлаб чиқара бошлайди. Истеъмолчиларга йилига 467 миллион кВт/соат электр энергияси узатиб, 126,2 миллион куб/метр табиий газни тежайди.
Улуғбек Қосимов янги ўрнатилган технологияларнинг иш жараёнларини кузатган. Улардан самарали фойдаланиш бўйича таклиф ва тавсиялар билдирилган.
2022 йил июнда “Тўпаланг” ГЭСдан юқори босим билан сув чиқиши акс этган видео тарқалганди. Фавқулодда вазиятлар вазирлиги сув омборининг мустаҳкамлигига зиён етмагани, айни вақтда чиқарилаётган сув ҳажмини камайтириш ишлари олиб борилаётганини маълум қилган эди. “Ўзбекгидроэнерго” модернизация лойиҳаси доирасида синов ишлари олиб борилаётган босимли сув қувури тўсини шикастланиб, қўшимча 40 метр куб/сония атрофида сув миқдори ГЭС биноси орқали чиққанини билдирган. Кўп ўтмай Сурхондарёнинг ўша вақтдаги ҳокими Тўра Боболов “Тўпаланг” сув омборидан туриб аҳолига видеомурожаат билан чиққанди.
Маълумот учун, Тўпаланг сув омбори 1982 йилда қурила бошланган бўлиб, лойиҳа қуввати 500 миллион куб метр. Сув омбори тўғонининг баландлиги 165 метр, яна 22 метр ер остига пойдевор қилинган, умумий 187 метрни ташкил қилади.
Изоҳ (0)