Navoiy viloyati IIB ijtimoiy tarmoqlarda tarqalgan Xatirchi tumanidagi maktablarning birida o‘quvchilar o‘rtasida yuz bergan janjal videosiga munosabat bildirdi.
Ma’lum qilinishicha, mazkur holat yuzasidan olib borilgan surishtiruv harakatlari davomida holat 23-fevral kuni soat 11:00 larda 58-sonli maktabning 11-sinf o‘quvchilari va 9-sinf o‘quvchilari o‘rtasida yuzaga kelgan kelishmovchilik natijasida janjal sodir bo‘lgani aniqlangan.
Buning oqibatida 11-sinf o‘quvchisi J.L. va 9-sinf o‘quvchisi A.I. yengil tan jarohati olgan.
Tegrovga qadar tekshiruv harakatlari natijasida to‘plangan hujjatlarga ko‘ra, ushbu janjalda ishtirok etgan 13 nafar voyaga yetmagan maktab o‘quvchisining ota-onalariga nisbatan Ma’muriy javobgarlik to‘g‘risidagi kodeksning 47-moddasi bilan tegishli hujjatlar rasmiylashtirilib, tuman voyaga yetmaganlar komissiyasiga yuborilgan va baʼzaviy hisoblash miqdorining 1 (bir) baravari miqdorida jarima jazosi tayinlangan.
Shuningdek, yuqoridagi kabi holatlar kelgusida takrorlanmasligi uchun tuman IIB hamda maktab maʼmuriyati bilan birgalikda o‘quvchilarning ota-onalari bilan holat yuzasidan muhokama tashkil etilgan.
O‘quvchilar o‘rtasida mushtlashuvlar
2022-yilning oktabrida ijtimoiy tarmoqlarda Namanganning Kosonsoy tumanida maktab o‘quvchilari mushtlashuvi aks etgan tasvirlar tarqalgandi. Noyabrda esa Toshkentda o‘quvchilar futboldagi janjal sabab mushtlashib ketgan edi. Keyinroq poytaxt IIBB voqeaga munosabat bildirib, mazkur holat yuzasidan Yangihayot tumani IIO FMB tomonidan tekshiruv o‘tkazilayotganini ma’lum qilgan.
Shuningdek, Toshkentda maktab o‘quvchilari “Amerika kinosiga taqlid qilib” mushtlashuv uyushtirgani, Xorazm viloyati Urganch tumanida joylashgan ikki maktab o‘quvchisi o‘rtasida janjal sodir bo‘lgani to‘g‘risida xabar berilgandi.
Izoh (0)