Хитойнинг TikTok ижтимоий тармоғидан фойдаланиш АҚШнинг Монтана штатида қонун билан тақиқланди. Штат губернатори Грег Жанфорте TikTok’ни тақиқловчи қонунни имзолади.
Жанфорте ушбу тақиқни штат аҳолисининг шахсий маълумотларини Хитой Коммунистик партиясидан ҳимоя қилиш билан изоҳлади. Унинг фикрича, TikTok миллий хавфсизликка хавф солади.
Губернаторнинг айтишича, у штатда “хорижий душманларга” маълумотларни узатувчи ҳар қандай дастурни блоклаш ҳақида буйруқ берган.
Эслатиб ўтамиз, АҚШ Конгресси ҳукуматга TikTok ва Америкага дўст бўлмаган мамлакатларнинг шунга ўхшаш бошқа дастурларини тақиқлаш ҳуқуқини берувчи қонун лойиҳасини тайёрламоқда. Маҳаллий ҳокимият уларни миллий хавфсизлик учун таҳдид деб билади. Аввалроқ АҚШ ҳукумати қурилмаларида TikTok’дан фойдаланиш тақиқланган эди.
Бундан ташқари АҚШ давлат университетларининг баъзиларида талабаларга кампусга тегишли Wi-Fi тармоқлари орқали TikTok’дан фойдаланиш тақиқланган. Rew Research Center маълумотларига кўра, АҚШдаги ўсмирларнинг учдан икки қисми тармоқдан фойдаланади ва бу ёшлар орасида YouTube’дан кейин иккинчи ўринда туради. TikTok вакиллари ушбу чекловлардан хавотирда эканини билдирган.
Изоҳ (0)