Ҳозир асосий вазифа Москва ва Киев орасидаги можарога барҳам бериш, улар ўртасида кейинги қарама-қаршилик учун шароит яратмаслик. Буни эса Украинани НАТОга қабул қилиш орқали таъминлаш мумкин, чунки “мамлакат раҳбариятининг ўзи тажрибасиз”. Бундай фикрларни АҚШ президентининг миллий хавфсизлик бўйича маслаҳатчиси ва собиқ давлат котиби, 99 ёшли Генри Киссинжер The Economist нашрига берган интервьюсида билдирди.
Киссинжернинг фикрича, тинчлик шартномаси қандай версияда бўлмасин Россия Қримнинг энг йирик шаҳри ва Қора денгиз флоти базаси бўлган Севастополни ўзида сақлаб қолади. Москва айрим позицияларидан айрилмоқда, аммо бошқаларини сақлаб қолмоқда. Бундай натижа ҳар икки томонни ҳам қониқтирмаслиги мумкин, бу эса янги қарама-қаршилик омилига айланади.
“Ҳозир европаликлар (Украинанинг альянсдаги истиқболлари ҳақида) айтаётган гаплар, менимча, жуда хавфли. Чунки европаликлар: ‘Биз уларни НАТОда кўришни истамаймиз, чунки бу катта таваккал. Шунинг учун уларга энг замонавий қуролларни берамиз’ демоқда”, — таъкидлади Киссинжер ва Украинани “Энг яхши қуролланган, аммо раҳбариятининг стратегик тажрибаси энг кам бўлган Европа мамлакати” деб атади.
Собиқ давлат котиби Украинани ҳимоя қилиш ва шу билан бирга ҳудудий даъволардан узоқ тутиш учун уни НАТОга қабул қилишни таклиф қилди.
Киссинжер, шунингдек, Россия ва Хитой Украина бўйича муваффақиятли ҳамкорликни йўлга қўйишига шубҳа қилди. Интервьюда у Москва ва Пекин АҚШга нисбатан шубҳада эканини тан олди, бироқ ўзларида ҳам бир-бирига инстинктив ишончсизлик борлигини айтди.
“Мен ҳеч қачон Хитой ҳақида яхши гапирган Россия раҳбарини учратмаганман. Россия ҳақида яхши гап айтган Хитой раҳбарини ҳам учратмаганман”, — деди Киссинжер.
Хитойнинг уришни ҳал қилишдаги иштироки миллий манфаатлар билан изоҳланади, дейди у. Сиёсатчи Пекин Россияни қоралашдан бош тортаётгани, бироқ айни пайтда Украинани мустақил давлат сифатида сақлаб қолиш зарурлиги ҳақида гапириб, ядро қуролидан фойдаланиш эҳтимолини қоралаётганини қайд этди. Киссинжер Пекин ҳатто Украинанинг НАТОга киришини ҳам маъқуллашини истисно қилмади.
Изоҳ (0)