2017 йилда Нью-Йоркда ижарага олинган юк машинасида велосипед йўлакчасидаги одамлар устига бостириб борган ва саккиз кишининг ўлимига сабаб бўлган ўзбекистонлик Сайфулло Соипов интернет орқали ИШИД видеороликларини томоша қилиш орқали радикаллашган ва ҳалигача ҳужум уюштириш унинг диний мажбурияти бўлган эди, деб ҳисоблайди. Бу ҳақда 9 январь куни унинг суд томонидан тайинланган адвокати маълум қилди, деб ёзади CNN.
«Бугун бу ерда ўтирар эканмиз, у ҳали ҳам бунга ишонмоқда, у ҳали ҳам ИШИДнинг унга юборган хабарларига ишонади ва ўзи қилган иш Оллоҳнинг иродаси билан бўлган, деб билмоқда», — деди Соиповнинг адвокати Дэвид Паттон.
Соипов федерал судда 28 та айблов банди бўйича ўз айбига иқрор бўлмади, шуларнинг саккизтаси қотиллик, 18 таси эса суиқасд ва терроризм билан боғлиқ бошқа айбловлардан иборат.
Агар у айбдор деб топилса, у ўлим жазосига ҳукм қилиниши мумкин. Суд жараёни президент Жо Байден даврида ўлим жазоси ҳақидаги биринчи федерал иш ҳисобланади, аввалроқ у федерал даражада ўлим жазосини бекор қилишга ваъда берган эди.
Айбловлар 2017 йил 31 октябрь кунги ҳужум билан боғлиқ бўлиб, ўшанда Соипов юк машинасида Манхэттенда Вест-Сайд велосипед йўлакчасида велосипедчилар ва пиёдалар устига бостириб борганди. Сўнг, ўша пайтда ҳукумат маълум қилганидек, у мактаб автобусига бориб урилган, сочма ов милтиғи ва пейнтбол милтиғини қўлида тутиб юк машинасидан тушган. Расмий шахсларга кўра, у Нью-Йорк полицияси офицери томонидан ўқ узиб ярадор қилинган ва ҳибсга олинган.
Жиноят ишига қараганда, у терговчиларга, гўёки, ҳужумни қарийб бир йил давомида режалаштиргани ва ИШИД видеороликларидан илҳомланганини айтган.
9 январь куни судда прокурор Александр Ли ҳужум ҳақида гапириб, Соипов юк машинасидан қурол сифатида фойдаланиб, «вайронкорлик» ва «даҳшат» саҳнасини яратганини тасвирлаб берди.
Шундан кейин Соипов федерал агентларга ўзининг террорчилик фитнаси ҳақида гапириб беришга «интилди», деди Ли.
«У ФҚБ агентларига ўз ҳужумини қандай режалаштиргани ва машқ қилгани ҳақида гапириб берди. Унинг мақсади — имкони борича кўпроқ одамларни ўлдириш бўлганини айтди. ИШИД етакчиси ҳужумлар уюштиришга чақиргани, у эса бунга жавобан ҳаракат қилганини таъкидлади», — деди Ли.
Лининг айтишича, Соипов касалхонада федерал агентлар билан интервью чоғида ўз ҳужуми ҳақида эслаб жилмайган. Прокурорнинг сўзларига кўра, ўшанда у ўзининг касалхонадаги палатасига ИШИД байроғини осиб қўйишни ҳам сўраган.
Прокурорнинг айтишича, Соипов ҳамон ИШИДга нисбатан содиқлигини сақлаб қолган. У ҳужумдан кейинги йилларда қамоқхонада туриб амалга оширилган қўнғироқлар чоғида ўз оила аъзоларига ИШИД аскари эканлигини айтган.
Соиповнинг адвокати Паттон у ҳужум уюштирганини рад этмасдан, ўзининг кириш нутқини Соиповнинг мақсадларига ва унинг ИШИД билан алоқаларига қаратди.
Адвокат Соиповнинг хатти-ҳаракатларини «мантиқсиз» деб атади ва унинг қилмишини оқлаб бўлмаслигини айтди.
Айбланувчи ИШИДдан илҳом олган, аммо террорчилик ташкилоти ҳужумни уюштиришда унга ёрдам бермаган, деди Паттон.
Соиповнинг ҳужумидан кейин икки кун ўтиб, ИШИД ушбу ҳужум учун жавобгарликни ўз зиммасига олганди, тўғри, деди Паттон, аммо гуруҳ ундан аввал ҳам улар томонидан амалга оширилгани расман тасдиқланмаган ҳужумлар учун ҳам жавобгарликни олган.
«У бу ҳужумдан қутулиб, ИШИД ёки бошқа ташкилот аъзосига айланишни кўзламаган, — деди Паттон. — У ўлишига умид қилган».
Адвокатнинг айтишича, ҳужум қилиш чоғида Соиповнинг ИШИД билан қандайдир аҳамиятли тарзда боғлиқлиги бўлмаган. У узоқ масофаларга ҳайдовчилик қилиш чоғида ёлғиз қолиб, «экстремистик контентни истеъмол қилган» ва шу тариқа радикаллашган, деди адвокат.
Паттоннинг сўзларига кўра, у Ўзбекистонда маданий жиҳатдан мусулмон сифатида тарбияланган, лекин жиддий диний таълим олмаган, унинг оила аъзолари эса ИШИД тарафдорлари эмас.
Соипов АҚШга Ўзбекистондан 2010 йилда келган ва ҳужумга қадар Нью-Жерсида яшаган. Расмий шахсларга кўра, у рафиқаси ва уч фарзанди билан яшаб, Uber ҳайдовчиси бўлиб ишлаган.
Ички хавфсизлик вазирлиги маълумотларига кўра, у АҚШга грин-карта орқали келиб, кейинроқ қонуний равишда доимий резидентга айланган.
Изоҳ (0)