“Миллий тикланиш” партияси президентлик сайловида Шавкат Мирзиёев номзодини қўллаб-қувватлашини маълум қилди

“Миллий тикланиш” партияси ЎзЛиДеП билан биргаликда президент — Шавкат Мирзиёев номзодини қўллаб-қувватлашини маълум қилди, деб хабар беради ЎзА.

Қайд этилишича, 13 май куни “Миллий тикланиш” демократик партияси Марказий кенгашининг навбатдан ташқари пленуми бўлиб ўтган.

Пленум қатнашчилари миллий юксалишни амалда таъминлаётган, миллат ва ватанга садоқати, халқпарварлигини исбот қилган президент — Шавкат Мирзиёев номзодини Ўзбекистон Либерал-демократик партияси билан биргаликда қўллаб-қувватлаш лозим, деган хулосага келган.

Пленумда муддатидан илгари президентлик сайловларида Шавкат Миромонович Мирзиёев номзодини илгари суриш бўйича тегишли қарор қабул қилинган.

Тошкент шаҳрида 12 май куни Тадбиркорлар ва ишбилармонлар ҳаракати — Ўзбекистон Либерал-демократик партияси сиёсий кенгашининг навбатдаги мажлиси бўлиб ўтганди. Йиғилишда партия номидан Шавкат Мирзиёев номзодини президентлик сайловларига таклиф этиш лозимлиги таъкидланган. Партия сиёсий кенгаши аъзолари номзодни президентликка кўрсатиш масаласини навбатдаги партия съезди муҳокамасига киритилишини бир овоздан қўллаб-қувватлаган.