Тошкент шаҳар Яккасарой туманида пиёдалар ҳаракатланишига халақит бериб келган қурилиш масъуллари жавобгарликка тортилди. Бу ҳақда Табиат ресурслари вазирлиги Тошкент шаҳар бошқармаси хабар берди.
Блогер Никита Макаренко ўзининг Telegram’даги канали орқали Яккасарой туманида олиб борилаётган қурилиш ишлари пиёдалар ҳаракатланишига халақит берган ҳолда амалга оширилаётганини маълум қилди. У қурилиш бўлаётган ҳудуд тупроқлари ташқарига чиқиб кетгани, натижада пиёдалар автомобиль йўлидан ҳаракатланишга мажбур бўлаётгани тасвирланган видеоларни жойлаштирган ва пойтахт ҳокимлиги ҳамда Қурилиш вазирлигини бунга чора кўришга чақирган.
Мазкур ҳолат Тошкент шаҳар Табиат ресурслари бошқармаси Яккасарой туман инспекцияси томонидан бориб ўрганилиб, қурилиш объектидан ҳосил бўлган тупроқлар кўча юзига чиқиб кетгани аниқланган.
Ушбу ҳолат тезкор равишда Яккасарой туман ҳокимлиги, ТОБ билан биргаликда бартараф этилган. Мазкур ҳолатга йўл қўйган қурилиш ташкилоти масъулларига нисбатан Маъмурий жавобгарлик тўғрисидаги кодекснинг 91/1-моддаси (белгиланмаган жойларга қаттиқ маиший ва қурилиш чиқиндиларини ташлаш, шунингдек, суюқ маиший чиқиндиларни тўкиш) билан БҲМнинг 3 баробари (990 минг сўм) миқдорида жарима қўлланилган.
Куни кеча Тошкентда 3 қават қилиб қурилиши режалаштирилган бинода ноқонуний тартибда қўшимча 9 қават ва мансарда қурган тадбиркор аниқланганди.
Изоҳ (0)