Самарқанд туманида фуқаронинг 6 бош қўйи бўғизланиб, эгасига таҳдидомуз хат қолдирилгани тўғрисида хабар берилганди. Самарқанд вилоят ИИБнинг маълум қилишича, мазкур жиноятни содир этган гуруҳ аъзолари қўлга олинган.
Қайд этилишича, 23 апрель куни туман ИИБга “Бадал” МФЙда яшовчи 28 ёшли Б.Ф. ариза билан мурожаат қилган. Унда 22 апрель кунига ўтар кечаси туманнинг “Бадал” маҳалласи ҳудудида жойлашган ўзига тегишли деҳқон хўжалиги ер майдонидаги қўйхонасига номаълум шахслар ғайриқонуний равишда кириб, қўйхонадаги 12 бош қўйдан 6 донасини сўйиб, 3 донасини яширин равишда талон-торож қилганини билдирган.
Воқеа жойи тезкор-тергов гуруҳи томонидан кўздан кечирилиб, таҳдидли сўзлар ёзилган дафтар варағи далилий ашё сифатида ҳужжатлаштирилиб, хатшунослик экспертизаси тайинланган.
Ҳолат юзасидан Жиноят кодексининг 169-моддаси (ўғрилик) 2-қисми “г” банди билан жиноят иши қўзғатилиб, тергов ҳаракатлари давомида жиноятни содир этган шахслар аниқланган.
Жами уч нафар шахс ҳодиса содир бўлган тунда қўйхонага бориб, қўйларни бўғизлаб, уч донасини Nexia’га ортиб кетган. Улар қўйлардан бирини сўйиб, қолган икки донасини яшаш хонадонида сақлаб келган.
Ҳозирда тергов ишлари давом эттирилиб, жиноий гуруҳ ташкилотчисини қўлга олиш чоралари кўрилмоқда.
Изоҳ (0)