“Milliy tiklanish” partiyasi O‘zLiDeP bilan birgalikda prezident — Shavkat Mirziyoyev nomzodini qo‘llab-quvvatlashini maʼlum qildi, deb xabar beradi O‘zA.
Qayd etilishicha, 13-may kuni “Milliy tiklanish” demokratik partiyasi Markaziy kengashining navbatdan tashqari plenumi bo‘lib o‘tgan.
Plenum qatnashchilari milliy yuksalishni amalda taʼminlayotgan, millat va vatanga sadoqati, xalqparvarligini isbot qilgan prezident — Shavkat Mirziyoyev nomzodini O‘zbekiston Liberal-demokratik partiyasi bilan birgalikda qo‘llab-quvvatlash lozim, degan xulosaga kelgan.
Plenumda muddatidan ilgari prezidentlik saylovlarida Shavkat Miromonovich Mirziyoyev nomzodini ilgari surish bo‘yicha tegishli qaror qabul qilingan.
Toshkent shahrida 12-may kuni Tadbirkorlar va ishbilarmonlar harakati — O‘zbekiston Liberal-demokratik partiyasi siyosiy kengashining navbatdagi majlisi bo‘lib o‘tgandi. Yig‘ilishda partiya nomidan Shavkat Mirziyoyev nomzodini prezidentlik saylovlariga taklif etish lozimligi ta’kidlangan. Partiya siyosiy kengashi a’zolari nomzodni prezidentlikka ko‘rsatish masalasini navbatdagi partiya syezdi muhokamasiga kiritilishini bir ovozdan qo‘llab-quvvatlagan.
Izoh (0)