Самарқанд вилоятининг Паст Дарғом туманида маҳалла раисларига босим ўтказиб, уларни “Менинг йўлим” лойиҳасида ўзи талаб қилган ташаббусга овоз йиғишга мажбурлаган мансабдор ишдан олинди.
Бу ҳақдаги хабарни “Дарё” журналисти билан суҳбатлашган Самарқанд вилояти ҳокимлиги ахборот хизмати раҳбари Манучеҳр Мирзаев ҳам тасдиқлади.
Масъулнинг маълумот беришича, мазкур ҳолат вилоят ҳокими, вилоят прокурори ва Ички ишлар бошлиғи иштирок этган йиғилишда муҳокама қилинган.
“Биз одатда ҳар пайшанба куни 12 та усулда, жумладан ижтимоий тармоқларда катта қизиқиш билдирилаётган мақолалар орқали олиб чиқилган мурожаатлар масаласини ҳам таҳлил қиламиз. Кеча вилоят ҳокими, вилоят прокурори ва Ички ишлар бошқармаси бошлиғи иштирок этган йиғилишда мазкур масала кўриб чиқилди. Бу ишга қўл урган масъулдан нега бундай қилгани сўралди. У қилмишини тан олди. Аммо нияти кўпчиликка хизмат қилувчи катта чорраҳани таъмирлашга ҳисса қўшишдан иборатлигини билдирди. Лекин вилоят ҳокими нияти яхши бўлса-да, бу мақсадга кимларнидир мажбурлаш орқали эришиш хато эканини айтди. Шундан сўнг йиғилишда қатнашган вилоят Камбағалликни қисқартириш ва бандлик бош бошқармаси раҳбарлари аҳолининг бандлигини таъминловчи, уларга муносиб меҳнат шароити яратиб берилишини назорат қилувчи ташкилот раҳбарининг бундай қилмишини оқлаб бўлмаслигини айтиб, у билан тузилган шартномани бекор қилиш керак деган хулосага келишди”, — дейди вилоят ҳокимлиги ахборот хизмати раҳбари.
Аввалроқ Паст Дарғом тумани ҳокимлигида Камбағалликни қисқартириш ва бандлик бўлим бошлиғи лавозимида фаолият юритаётган Тоҳир Қосимов Telegram мессенжеридаги гуруҳ орқали тумандаги МФЙ раисларига босим ўтказиб, ишдан бўшатиш билан қўрқитиб, уларга ўзи айтган лойиҳага овоз бериш мажбуриятини қўйган.
Тармоқларда тарқалган скриншотларда мансабдор “Тезлаштиринглар, соат 12 да овоз бериш жараёни тугайди. Ҳурматли раислар, хулоса қилинглар, хафа бўлмасаларингиз бўлди”, — дея уларга босим ўтказишга уринганини кўриш мумкин.
МФЙ раисларини овоз беришга мажбурлаган мансабдор Шерзод исмли бошқа бир ходимига МФЙ раисларини чақириб, уларнинг паттасини олиши кераклигини уқтирган.
“Дарё” мазкур ҳолат юзасидан Паст Дарғом тумани ҳокими Ваҳобжон Муродқобилов билан телефон орқали боғланганди. Мазкур вазиятга изоҳ берган ҳоким Ваҳобжон Муродқобилов “Бу ҳолатдан ҳозир хабар топдим ва ўзим учун дастлабки хулосани чиқардим. Аммо сизга айни пайтда бирор гап айтолмайман. Лекин вазиятни назоратга олиб, ҳолатни батафсил ўрганиб чиққанимдан сўнг фикримни баён қиламан”, — деганди.
Изоҳ (0)