Қорақалпоғистонда боғча тарбиячиси бир неча киши томонидан калтакланди

Қорақалпоғистон Республикаси ИИВ Тўрткўл туманидаги боғча тарбиячисининг калтаклангани бўйича маълумот берди.

Қайд этилишича, 10 май куни Тўрткўл тумани “Анҳорли” ОФЙда жойлашган 21-сонли боғчада 38 ёшли К.Н. тарбиячи ва мазкур боғчада мусиқадан дарс берадиган 40 ёшли А.Д. ўртасида жанжал келиб чиққан.

Жанжал вақтида фуқаро А.Д. фуқаро К.Н.нинг уст кийимларини йиртиб ташлагани сабабли аёл содир бўлган воқеани турмуш ўртоғи, ҳозирда “Кўнгилли ёнғин обод” МЧЖда ишловчи К.М.га айтиб берган. Бундан жаҳли чиққан К.М. укалари К.Ж. (1992 йилда туғилган) ҳамда К.Б. (2002 йилда туғилган) билан боғчага бориб, фуқаро А.Д.ни калтаклаган.

Ҳодиса оқибатида А.Д. Тўрткўл тумани тиббиёт бирлашмасига тан жароҳатлари билан ётқизилган, ҳозирда унинг аҳволи шифокорлар назоратида. 

Ҳолат бўйича Тўрткўл тумани ИИБ томонидан тергов олди суриштирув ишлари олиб борилмоқда.

Ўқитувчиларнинг калтакланиш ҳолатлари

Сурхондарё вилояти Сариосиё туманида мактаб директори бир неча шахслар томонидан калтаклангани айтилган эди. Шунингдек, вилоятнинг Сариосиё тумани халқ таълим бўлими мудири ҳудуддаги мактаблардан бирининг директорини ҳақорат қилган эди. Бир неча кун олдин эса Фарғона вилояти Тошлоқ туманидаги мактабнинг бошланғич синф ўқитувчиси ўқувчисининг онаси томонидан калтакланганди.